بسم الله الرحمن الرحيم
السلام عليكم ورحمة الله وبركاته
اشتقت لكم يالنشاما ،،
هذه قصيدة للشاعر/ خليل المطيري
أتمنى أن تنال إعجابكم ورضــــــــاكم
يا خوي دنياك مـا تتـرك مشاكلهـا=في كل ساعه تزيـد ولا لهـا داعـي
إن جيـت أعلـل بلاويـهـا وأحللها=تشتت والهمـوم اشكـال وانواعـي
إليا تفكرت فيهـا قلـت مـا اهبلهـا=وإليا تفكـرت فينـا زادت اوجاعـي
لو جيت احاول مع الميـلات اعدلهـا=تصير مثل الهبوب وتخلف اشراعـي
ما اخبلك يا اللي مع دنياك تجهلهـا=الصبح غير المساء والوقت مرياعـي
لو استقرت ثـلاث ايـام بـا كملهـا=تقلب كما الذيب في ليله ليا جاعـي
تعـال خـل المشاكـل لا تخايلـهـا=وتصير مثل الجبل خطرٍ على الراعي
إن كان لي زلةٍ فـا القلـب شايلهـا=عز الله إن الفراق اقرب من اذراعـي
لا لا تشيـل المشاكـل واتحايلـهـا=أحيان تجلب مـن الأغـراب فزاعـي
النفس للشر تمشـي فـي حبايلهـا=لا قادهـا ابليـس نزعهـا تنزاعـي
العين بعض العرب لا جـاء يكحلهـا=سبب لها بالعمـى وابليـس بتاعـي
أبواب كـل المشاكـل قـوم قفلهـا=خل الزعل ما يفيد الراشـد الواعـي
ادمح لي الزلة اللـي كنـت فاعلهـا=وانا بعـد بأدفـن الـزلات بالقاعـي
تعـال صـف القلـوب ولا تزعلهـا=عطني يمينك وعهد الحب ما ضاعي
النفس تحتاج عزم وبـأس يصقلهـا=يا خوك لا ترتخي وتصيـر سماعـي
لا ترخي اذنك عن الـزلات عطلهـا=اعرض عن النمه اللي سوقها ذاعـي
واحذر من الوسوسه نفسك تشكلهـا=والظن سوءٍ على من كـان تباعـي
هاذي رسالـه وفكـر فـي معاقلهـا=واحذر من اللي مع الشيطان منصاعي
الناس يا خوك يـا مكثـر مشاكلهـا=بعض المشاكل فراق ولا لها داعـي
وسلامتكم ،، مع خالص التحية و الاحترام ،،