الله يجزى سود الايام بالخير
عرفت منها صاحبي من عدوي
فيها انكشف ما كان للعين تزوير
توي عرفت الخل واعداي توي
كنت اعتقد بعض البشر طبعها غير
فيها وفا مهما اتجرا واسوي
حتى عطتني سود الايام تقرير
عن واحدٍ كنت أحسب إنه خويي
وقت السعه صوته كما دقة الزير
ضحكه على اتفه ما يضحّك مدوي
ضاري ومتعوّد على دهنة السير
لا احتجت له ما قام غير امتلوي
يصرف من بنوكه كثير المعاذير
وإن كان جت فزعه يبي له مقوي
هذاك لو جت به عليّ المقادير
طفيّت عن مثله مناوير ضوي
ببعد عن دروبه ومن دون تفكير
ماني معكّر لجل شرواه جوي
الله يجزى سود الايام بالخير
عرفت منها صاحبي من عدوي