اقتباس:
المشاركة الأصلية كتبت بواسطة عبدالله العصيمي
قصيده كان لي الشرف بألقاها في الأمسية الشعرية التي كانت
مع عدد من شعراء الدواسر الذي اقيتم في دوله الكويت
واقول بيض الله وجيهكم يالدواسر على مافعلتوه
متواضعه ومضمونها فيها
دام القصايد فن وقفه ومحراف = واوزان وافكارٍ تغير صورها
تراعي الجمهور وتداو الاهداف = والشاعر الشاعر يغوص ببحرها
كلن يده تعطيه لاصار عراف = يغوصها غبه ويجمع دررها
لو كان ماينقص من الشط غراف = ولا احدٍ لقا له فكرةٍ واحتكرها
وانا ليامني بغيت ابدع القاف = ما احسب خسايرها واراعي خطرها
شاعر ولي عرفي مع الناس الاشراف = اترجم الافكار واقطف ثمرها
دايم وفكري للجزالات حواف = اما تجي له طيب والا سبرها
لامن دعيت لواجب فيه ميقاف = يشوش راسي فرصتي وانتظرها
من نجد سجت الرجل ما احسب للاكلاف = من دار ابو متعب وكلن خبرها
دار الرجال اللي على المجد وقاف = اخوان نوره درعها اللي نصرها
للجود وهابه و للحق سياف = ذخر الرجال اللي ربح من ذخرها
ذعذع هوا الغربي ذعاذيعه لطاف = في ليلةٍ ظلما قد انحى قمرها
طرا لي الممشى على ذيك (الاسلاف) = شمال شرقي نيتي واخبرها
كن الخفوق من الفرح فيه خفاف = يكتب وينظم والبيوت يحصرها
سلام مني عد وبال هتاف = اعذب من صدوق المخاييل وارها
وسميةٍ هلت وجايٍ لها شعاف = تنقل خفاف البذر وارخت مطرها
ثم صارت البيدا بساتين و ارياف = متخالط عشب الفياض وزهرها
يفوح فيه الهيل من كل الاصناف = من دلةٍ بن اليماني ذعرها
من جودكم ياهل الكرم واهل الانصاف = وبيض الصحون اللي تملى سفرها
يوم الليالي شح وايامها عجاف = كم دولةٍ جود الصباحي غمرها
اخوان مريم لا اعتزوا دون الاسلاف = دكوا عمايرها على اللي عمرها
من هازهم يوم اللقا صابه ارجاف = ولا احد يلومه لو تجرع كدرها
واللي يبي مني مضامين واحلاف = اقول له مني تفضل وزرها
لو بستمر بمدحكم شيب القاف = لكن هي كلمه وانا بختصرها
والله ونعم ونعم ماطاف طواف = ياهل الكويت اقولها واعتبرها
وسلامتكم |
الأخ المميز بشاعريته ، والمتفرد بأخلاقه (( عبدالله العصيمي ))
بل كان لنا الشرف نحن أن شاركتنا في أمسية الكويت الخالدة
وشهادتي في شخصك الرائع مجروحة .. ولكن اسمح لي بإهداء بيتين سبق وأن أهديتها كرسالة جوال لابن عمك الشهم ماجد بن محمد العصيمي:
يابنت ياللي لها زين(ن) تماري به=ياللي هدب رمشها فعيونها ساجد
لاتعشقين إلا صبي(ن) ربعه عتيبه=(عصيمي) لا انتخى وإذا اعتزى (ماجد)
ياطيب طيبه شهادة حق ياطيبه=له باقصر المدح لو كان العرب واجد
ولا على الجميع زود
وتقبل المحبة والتقدير ،،،