ما عاد ألوم الوقت لو الخلل بـان = ولالي على الأيام شرهه ومنقـود
دام التفرق صار عنوان الاخـوان = وصار الزعل من بينهم دايم يسود
ابليس يركض بينهم يعزف ألحان = وإن شاف فرصه ينفث السم ويزود
لين الاخوّه سهمها صار خسـران = وسهم التعاضد منقلب كره وصدود
يا حيف والله يا رجالٍ لهم شـان = عقب المعزه جمعهم ليـه مهـدود
وشلون ينسى علم قالـوه شيبـان = ويا كيف ضاعت كلمةٍ قالها العود
نصيحةٍ قد قيل تشـرى بالأثمـان = خل التواصل بينكم كـف ممـدود
في جمعكم يجي لكم ثقـل الأوزان = وألا التفرق كسرته كسرة العـود
للشاعـــــــــــــر خالـــــــــد السبيعـــــــــــــــــي