اعزائي الكرام أهالي و منسوبي منتدى قبيله الدواسر هذه الابيات التي اهداها لنا الشاعر القدير وابن العم عبدالله الحقباني صح الله لسانه ويليها الرد عليها
قرّبوا لي دفتري جت يالعوّيل=جزلةٍ من جيز جزلاتٍ تنادي
القوافي في فضا فكري تميّل=يالله اني طالبك عطني مرادي
مطمعي ما هوب في الغاز المسيّل=لا و لا همّي هلالي و إتحادي
جيت ألبّي دعوةٍ لأهل السليّل=ربعي اللي تنثني وقت الطّرادي
حبّهم في ضامري ما هو قليّل=هم بني زايد إلا إشتب الزّنادي
يوم ابن فرحان ما قال الحليّل=مكرم الضيفان في ليل الهجادي
عودٍ أزرق عقب فنجالٍ مهيّل=و الشحم تلقاه بصحون و بوادي
الدواسر عزوتي فوق التخيّل=أشهد إنهم كيف راسي و القنادي
مسّسين المجد ما جاهم تحيّل=بالصخا و الجود و سيوف الهنادي
من حربهم ينكتب حظّه منيّل=و إن وزاهم مجرمٍ حطّ الوسادي
و ان عطوا يعطون وزنٍ ما يكيّل=واسمينٍ للعصا سلم إنفرادي
إسمهم ثلث الجزيره به مذيّل=ما ذِكِر غير الدواسر فيه وادي
ونيابة عن ابناء عمومتي اهالي مدينة السليل اتشرف ان اخدمهم في الرد على ابن العم عبدالله الحقباني بهذه الابيات والتي اتمنى ان تنال اعجابكم وتوفي حق ابن العم الشاعر القدير عبدالله
يامخال الموهبه خيل وسيل = سيل يغطي جبلها والحمادي
يوم عبدالله بجزل القاف خيل = وهل قيفان جزيلات جدادي
مرحبا بأسمي وبأسم اهل السليل = وبأسم فرحان ولد عمي سنادي
مرحبا ياضيفنا نوخ وقيل = شوفتك يوم من ايام العيادي
يابعد من فكره ضعيف هزيل = ضايع راية وعاده في تمادي
سلها ياشوق من كنها الغزيل = وعينها عين اشقر وقت الهدادي
واترك اللي غله بصدره مغيل = وراية البيضا لك بروس المبادي
يابن من يردون لاهاب الذليل = لاد تغلب خازمة خشم العنادي
درعنا لامن زما العايل وعيل = يرهبون الضد بسيوف حدادي
زايد وتغلب فنا الظان المحيل= من حربهم ماينادي له منادي
يضهده دوسر ويبطي في توويل = من قساوة ضرب خطلان الايادي
وهم غناة وهم ذرى راعي الرحيل = لا جلا من وفقر والا من الأعادي
حمله يجي لا ثقيل ولا ثقيل = تصبح حموله مثل ريش الجرادي
الشاعر عبدالله بن مرضي الودعاني
وانا بسمي شخصيا ونيابه عن اهلي اهل السليل نشكر شاعرنا وشاعر الوداعين كافه عبدالله بن مرضي الودعاني
ونقول له يابو طلال بيض الله وجهك ورايتك البيضاء
وعبدالله الحقباني يستاهل ويستاهل اللي هو منهم وعبدالله اخونا ونشكره على ما قال والله يخلينا لبعض اخوان وعلى الحق اعوان واشكر اداره هذا المنتدى على ان جعلت بيننا همزه واصل لتبادل المشاعر والشعر مع من نحبهم ويحبوننا
وتقبل تحيات ابو فهد وسامحونا على التقصير