[معلومات العضو ابن طواري الخييلات]

بداح بن مطرف الخييلات

ابن مطرف غني عن مدحي ولكن هذا الي حاصل ودي ابين ولو شي بسيط من محاسن بداح بن مطرف .

فهو رجل ٍ معروف عند ربعه وبني عمه وفعله وطيبه مع الأجناب وابن مطرف مظهره فعل يمناه وهو يستاهل أكثر بكثير من هذا الكلام ولا يهونون الجميع.

في يوم من الايام سيّر علينا (ابن مطرف) عند الإبل ، وشاف الذود وبارك لنا وشجعنا واستمعنا لنصايحه وارشاداته لأن الواحد الحقيقه اذا كان توّه مبتدي في شيء يحتاج الى توجيه.

عزمنا (ابن مطرف) عند ابله قبلة ٍ من( سـاموده) في ذا الجو الي يشرح الصدر ربيع ومطر وخير وتمشيه عند البل ، طبعآ الكلام هذا قبل حوالي سنتين وقال جعله يسلم وياكم : (( لكم عندي لقحه وقعود ٍ فحل)) .

امه من ابل صاحب السمو الامير سلطان ابن محمد الكبير وحايزه على المركز الاول في مزاين الخييلات وابوه عليان ابعير ابن ثنيان العتيبي حايز على احدى المراكز المتقدمه في مزاين نوفا قبل حولي خمس سنوات.

وبعد هذا كله تمثّل الشاعر بهذه الابيات وهي في الحقيقه قليله في حق ابو فهد.

أبدى بذكر الله على كل الأذكار = الواحد المعبود والي التدابير
يا عالمآ ما بالعرب سر وجهار = العمر يمضي والليالي مدابير
يا مرحبا باللي لفو البيت زوّار = وعداد ما خط القلم بالتقارير
يا مرحبا يا (بداح) بقدومك الدار = ترحـيبة ومـعطرة بالـنواوير
تسلم ويسلم من عطاياهم كبار = عطيته من جل ذودٍ مغاتير
له مدةٍ جزله من الشول وخيار = مهيب حيا الله مطايا مداوير
مرباعهن قبله وفي القيض محدار = يتبع هواهن في طوال المشاوير
هذاك (بن مطرف) لا صار ما صار = لا فرعن بيض العذارى الغنادير
يرخي رسنها كل ما عجّها ثار = يضحك ولو صفت عليه الطوابير
لا كثرة الاريا مع الناس ما شار = يجبع برايآ مثل حد البواتير
سقمآ على العايل كما السيف بتّار = ريف الرفيق اللي حدته المقادير
يستاهل العليا على كل مشهار = زحل الرجال اللي يخسر الدنانير
هذا كلام اللي بدع زين الأشعار = في حق منهو وافي ِبالتعابير
وختامها صلوا على راعي الغار = واللي تبع نهجه وجيه ٍمسافير

وسلامتكم ...



الشاعر/ مرزوق ابن حليس الخييلات الدوسري.