هذه القصيدة من روائع قصائد خالد ابن مدعث الحديثة والتي سمعتها في شريط تواصيف وقصيدة رائعة جدا في الوصف واترككم مع القصيدة ومن يستطيع اضافة المقطع الصوتي لها فلايبخل علينا...
قصيدة المقناص
أنا ليا ضاق صدري واشتعـل جاشـي=داويت نفسـي مـن همـومٍ تناهشهـا
وضربت لي طرقةٍ تصعب على اللاّشي=وسرّيت رجلي ومسرى الليل ينعشهـا
ونحرت جوٍّ خلـيٍّ يوحـش أوحاشـي=صحاصح البيد طـبّ اللـي يعايشهـا
خالٍ جنابـه مـن العالـم والأدباشـي=قفرٍ مربّ الوحوش ومأمـن أوحشهـا
عشبه سوات الحمى ماهـوب ينّاشـي=لا راعي البـل ولا الشـاوي بنايشهـا
مايقطعـن فرجتـه حـرار الأبواشـي=الضمّر اللي وصوف الريـم تركشهـا
مايسهجه غير جيبٍ يطـرب الماشـي=مع واعر الأرض وألاّ مـع مفارشهـا
جيبٍ يبعّـد عـن مْعشّـاي مغباشـي=اللي يقـصّ الـدروب ليـا تناوشهـا
ماتسمع من المكينـه غيـر وشواشـي=ماكنّـه ألاّ الحيايـا فـي توشوشـهـا
لا فرّ من دوس رجلي صابه خراشـي=فـرّة قطـاةٍ دويّ الملـح خارشـهـا
يطيش من طيش سوّاقـه ليـا طاشـي=نوبٍ يخم الخطـوط ونـوب يقرشهـا
أبيـه لابـان نجـم ونجـم متلاشـي=وشفت السويبع مـع أخوانـه مداقشهـا
فـي ليلـةٍ وبلهـا هتّـان ورشاشـي=وقلايـد الوسـم مرخيـتٍ مراهشهـا
ليا أضمرنّ الفحول وجاهـن طياشـي=والأرض في بطنها قـرّت هوايشهـا
وراع الولع عقب موته لـه تنعواشـي=طيره على الكـفّ والدنيـا مطنّشهـا
ماعاد يطري له ألاّ بـرق الأرياشـي=اللـي علـى شانهـا البيـداء يفتشهـا
وأنا معي عـاريٍ ماهـوب بخياشـي=لاتلّ سيـره علـى المقفـي تفرّشهـا
عديم وأسمه عديمٍ ما أسمـه شلاشـي=زرق الشوش لالحقهـا علّـق شوشهـا
ومن لا عرف لذّة المقناص ماعاشـي=ولعـه بليّـا طماعـه ميـر عايشهـا
يسلى بها الخاطر ليا ضـاق وانداشـي=وترتاح بالنوم عينـي يـوم أغلمشهـا
ماتسمع اذني صدى لجـلاج وهواشـي=ألاّ السواري مـع الظلمـا تخترشهـا
يالايمـي خلّنـي بصـدّ وانحـاشـي=عن شوف ناسٍ ماغير تلوّي خششهـا
والله إن يبطي مع المقناص مطراشـي=ليـن المنيّـه نقابـل وجـه طارشهـا
هذا الدواء اللي يداوي حـدبٍ هشاشـي=من هاجـسٍ لاتحـرّك قـام يجرشهـا
صح الله لسانه من شاعر ولله دره
وتحياتي للجميع