السلام عليكم ..
ناديت ياطير(ن) شهر شامخ الراس=ألوح فالمرقاب وأزريت أشوفه
ريشه هواا بين المقادير والناس=وصارت خراعيب الحباري تلوفه
جف القلم وأرخى جناحين عبّـاس=لا والله ألا ماعليها حسوفه
شفت الرجال أجناس والعرق دسـّـاس=ومواطن الشيمات ضحكة هنوفه !
فيهم عريب(ن) عنبره طيب الأنفاس=يغنيك والشيمه عليه امخلوفه
يلمع من الداخل كمايلمع الماس=ماضاع نوره في ليالي خسوفه
والطـّيب عِليَت قوم من ماض الأرماس=والراس راس ولانشد عن حتوفه
وفيهم وضيع(ن) في معانيه محتاس=ضيّع سيوفه في معاني حروفه
يضيع صوت النجر مع دق الاجراس=لوكان شراّب القهاوي يحوفه
وترى الردى من بادي الوقت وسواس=يبني به الرعديد ساسه وطوفه
يعيش عمره فاقد الشي حساّس=آخّاذ مايعطي وهذي ظروفه
يبرق على خد السما برق ميّاس=ويعميك عجه في مثاني شعوفه
طيبه على المكشوف مشوار عساّس=وباقَ المعاني في مداه معروفه
جوّه من العتمه غثاريب نسّاس=يفوح من داخل ضميره وجوفه
وين أنت يـ ..ألي لأبيض الطيب غراّس=يفعل ولاينشد عن ألي يشوفه
رجل(ن) جدوده للمواجيب نبراس=مغروس طيبه بين جلده وصوفه