السلام عليكم ورحمة الله وبركاته ،،
قصيدة اعجبتني للشاعر/ سعد المهداني القحطاني ،، وعسى أن تنال إعجابكم يالغاليين:
من عادتي ما أحط للفكـر مـزلاج=والنفس أروضهـا أجـود رسنهـا
لا جات من فكري مفاريد وازواج=قام الورق مـن لهفتـه يحتضنهـا
البارحه حطيت لي خمسه أبـراج=فأرض الخيال وشفت الأقطار منها
شفت النتيجه تشتكي هـم الإنتـاج=وشفت السنابل والرحى اللى طحنها
شفت الطريق المعتدل صار منعاج=وأحداث بهذلهـا الزمـان ودفنهـا
وجروح ناس مالها طـب وعـلاج=ونفوس مرضى والفرح ما سكنهـا
والكذبه اللى صورت فلـم دبـلاج=جت في مساحتها وجت في زمنها
تفننـوا فيهـا بتأليـف وإخــراج=وبثوا دعاية عشـرة أعـوام عنهـا
وأنا على مسراى والنـور وهـاج=آمر على مايطلـع الفكـر وأنهـا
دنياً بحر تسطفـق فيـه الأمـواج=ولافيـه مخلـوق حياتـه ضمنهـا
الناس مهما كـان للنـاس تحتـاج=في مالها في جاههـا فـي محنهـا
ناس تصير بساعه الضيق مخـراج=ومن حدته سـود الليالـي زبنهـا
وناس مراجلها سواليف وإزعـاج=لا فايـده فيهـا ولا خيـر منـهـا
والرجل له كلمه ومبـدأ ومنهـاج=ضريبتـه لا بـد يـدفـع ثمنـهـا