اخواني اعظاء منتدانا الكرام اهديكم هذه القصيده عسى ان تنال اعجابكم وهي في الحقيقه من اقل ماقدم لكم محبة وتقدير
سهيلٍ طلع ياللي ترقب طلـوع سهيـل=ترى القيظ حرَه راح وأقفـت لواهيبـه
راع البـر يالله يكملـه فالبلـد تكميـل=لاطرَِي له المظهار قربـت محاضيبـه
راع البر يلقـى ونسـةٍ جنسهـا قليـل=إليا من ظرب له فنتـقٍ عـاويٍ ذيبـه
بقفرٍ خـلا ماينظـر الـزول بالدربيـل=تخاتيـخ دوٍ روس الأمثـال تزميـبـه
يبوجه سواة الذيب لاأظلم عليـه الليـل=وفرخ العقاب يخاشـره فـي مراقيبـه
على شف قلبه ينزل وينـوي الرحيـل=وإليا من قزى من الخد ماعاد يمسيبـه
أنا أشوف قلبي دايـمٍ ينتحـي ويميـل=يحب البداوة ميـر صعبـت مطاليبـه
أحب البراري لاأبرد الجو حب الويـل=وجو البلد لـو مسكنـي فيـه ماليبـه
إليا أنشت مزون الوسم وأقبل لها مخيل=مـزونٍ هواهـا ساكـنـاتٍ دواليـبـه
عساها تنثـر لاأرتـدم نوَهـا وتسيـل=تفيَـض وتمـلا كـل وادي وتنحيـبـه
علـى ديـرةٍ لامرَهـا عابـر السبيـل=لقالـه إرجـالٍ فـي إحماهـا تهليبـه
ديـار آل زايـد لابـةٍ فعلهـم جزيـل=أهل موقفٍ ينشـاف وسلـومٍ صعيبـه
رجالٍ تعـز الجـار وتزبَـن الدخيـل=وللضيـف حـقٍ دايـم الـدوم توفيبـه
إليا من غلت الأسعار ماتذبح إلأ الحيـل=تسوق الثمين وغالي المـال تصخيبـه
هل إبلٍ وأهل هجنٍ منعَت وأصايل خيل=وأهل سمعةٍ بين القبايـل وأهـل هيبـه
وأهل شيمةٍ تعرف ومجدٍ لهـم سليـل=توارث إسلومه يـوم شـدَوْ مقاظيبـه
وأهل رايةٍ عليا وأهل مدن وأهل نخيـل=نخيلٍ ثمرها مـن لفـا الـدار يجنيبـه
غروسٍ تهـزَع بالثمـر ظلهـا ظليـل=يقيَـظ بـه اللـي خاليـاتٍ مزاهيبـه
وأهل منسفٍ ينسف وسيفٍ معه صقيـل=وأهل مرتعٍ في ديرة الخـوف تنويبـه
تسجَه بذيـدانٍ عليهـا الشحـم حويـل=من أول نبات الوسم ترعـى وتبطيبـه
وأهل نطحةٍ تعرف بهـا ذلـة الذليـل=لاطري بها الصاحب تبرى من صحيبه
وأهل عيلةٍ تكسر شبا من نـواه يعيـل=يعـوَد بغبنـه كسبـه الـذل والخيبـه
وأهل نخوةٍ منها كثيـر الهمـوم تزيـل=تورَد هليـكٍ ماصفـت لـه مشاريبـه
على ماردٍ في ظفهم مثـل نهـر النيـل=لاعاد الشحـاح تبيـع ماهـا وتشريبـه
يامال المعزَه كـل ماكـان فيهـم قيـل=مايلحق فعايلهم وأنا ماأقـدر أحصيبـه
ترى أكبر دليلٍ يوم جلَـوْ بنـي عقيـل=من واد العقيق ونزَحـوْ منـه أجانيبـه
وربعي لهم مع كاسبين الفخـر تنفيـل=يسمون بإسـم مجمـل النـاس تدريبـه
عصاة تضـد الشـره لاظيَـع الدليـل=إليا شب نار الحـرب زادوْ مشاهيبـه
وأهل فزعةٍ لاجاء لهم مومـي الشليـل=إليا جات به صلفـات الأيـام توميبـه
يشيلون من ظيمه ومـن حملـه الثقيـل=وينسى العنى ماعـاد يـدرى عواقيبـه
أعد الصحيـح بـدون زورٍ ولاتظليـل=وترى الناس كلٍ دون حقَه ظهر طيبـه
تروم الوفاء الأجـواد وتفظلـه تفظيـل=الأجواد تكسب كـل طيـبٍ وتحريبـه
أقوله وأنا للبدو طـول الدهـر عميـل=شفـوقٍ وقلبـي رغبـة الـود تدويبـه
على ديرةٍ ممشـاً بهـا يشفـي العليـل=هواهـا بريـح إفياظهـا فايـحٍ طيبـه
أنا عندي إنها ألذ من مسكنٍ في وتيـل=من أوتيل خمس نجوم مابغيه واللي بـه
فجوج الخلا لو خيروني هـي البديـل=تسلَيك عـن روتيـن وقتـك وترتيبـه
بعيدٍ عن إزعاج المخاليق قـال وقيـل=وعن شوف ناسٍ مسلك الغش تسعيبـه
ترى والله مايشفـي ولايبـرد الغليـل=يكود السعه لاشفت بالعين لـك ريبـه
وترى فايدة سـج القـدم مالهـا مثيـل=يكفيـك فـي قـول السديـر تجاريبـه
وأنا أقول غير الدين ماللبشـر حصيـل=ترى الوقت يخلف ظن من كان يرهيبـه
ترى الوقت للي جاهلٍ دورتـه طويـل=تعرفَه مـن أيامـه ولاينعـرف غيبـه
أبعطي خبر موجز وباأفصلـه تفصيـل=وأنا ماأدعي وأقول قلته وأنـا أمشيبـه
كلامي لاجاء أهل العرف بتحلله تحليل=فلكـن شـيءٍ جايـزٍ لـي باأوصيبـه
إليا الله عطا الأنسان لايذخـر الجميـل=ترى إحسان كل إنسان يستر على عيبه
راع الطيب يبقى في عيون العرب جليل=وعند العـرب حتـى قريبـه يماريبـه
إليا من بغيت الطيب سلمه يبـي قبيـل=إليـا طلـب شـيءٍ تاجـده لاتعييبـه
تجمل ونفسك عندهـا لاتصيـر بخيـل=ومن له عليك حقـوق كمَـل مواجيبـه
تمتع وعش وإكسب ولاتاخـذ الهزيـل=ورزق الحرام إترك إدروبه وأساليبـه
مادامك قوي والله هو اللي قوي الحيـل=تغانم شباب العمر وأكسـب مكاسيبـه
ترى كل وقتٍ بان دوره يجي له جيـل=وماجابتـه سـود الليـالـي بتقفيـبـه