الله من قلب ٍ غـدت بـه طواريـه=على خطر لـولاي اقصّـر حبالـه
احيان اخم الصبر واحيانٍ اخطيـه=لانيب لاعايـل ولاارضـى بعالـه
ان جات كلمه ناقصه من مسافيـه=الاولــه والثانـيـه فالـزبـالـه
والثالثه عرقاه مـن بيـن اذانيـه=تودبـه وتـودب اهـل الـرزالـه
مجامل النصـاب مخلـف مباديـه=وش عاد لو يجلس بعـزه لحالـه
بعض العرب ضو الفلاشات معميـه=وهو الكريم اللـي كريمـه سبالـه
وانا اعبد الله مااعبد فلوس ووجيه=كرامـة الرجّـال هـي راس مالـه
المجلس اللي مـا يقـدرك راعيـه=خله ويغني عـن حرامـه حلالـه
على الردي ماني بأسوق المشاريه=اشره على اهل الطيب واهل الشكاله
الحر حـر ونعرفـه مـن مجانيـه=والبوم بـوم ولـو يغـرّه خيالـه
وهرج الردي يبيـن بـه مايخفيـه=واهـل الجهالـه ماتكـب الجهالـه
ومن عادة الرخمه يمـوّه معانيـه=ويحطهـا بيـن المـزح والنذالـه
انا احسب اني غالي ٍمثل مااغليـه=واثره يكـن الشـر لاطـاب فالـه
اللي مـن النعمـه كبـارٍ علابيـه=ماهوب راعـي طيـب والّا جمالـه
قلبه على ربعه من الحقـد ماليـه=ولايشتم اهل الطيب غيـر الحثالـه
حنـا منازلنـا رفيـعـات يابـيـه=واهل السفاله عايشه فـي سفالـه
لكن تال الوقـت هـاذي شواريـه=سادوا به اهل الغي واهل الضلالـه
كلٍ يقول الطيب من طيـب اهاليـه=تصـدر المجلـس وميّـل عقالـه
القصيدة للشاعر/ عوض فرج ،،، عسى أن تنال رضاكم ،،،
مع خالص التحية و التقدير و أوفى الاحترام.