الأخ العزيز غياث
لاهنت على نقل هذه القصيدة الرائعه
وصح الله لسان الشاعر نفل بن سعود الخرفاني الدوسري
قبل نبدا نذكر اللي خلقنا فالوجود=رازق المخلوق في برّها وبحورها
جلّ شانه ما خضعنا لغيره فالسّجود=والأوادم يعلم اللي تكن صدورها
بعد هذا عد ما حنّ زلزال الرّعود=في مزونٍ لاتنشّت يزين حدورها
يا سلامي يا رجالٍ عريبين الجدود=يا رجالٍ فالمواقف طوال شبورها
يا هل العادات والطّيب والفعل امحمود=المشاعر تبني الشّعر لاجاء دورها
والمزاين صار عند الدّواسر فالنّفود=حفلته في لبّة العرق يجذب نورها
بيّض الله وجه من رزّ للخيمة عمود=والنّشامى شاركت فيه من ميسورها
قوّموه أهل الجمايل محللة العقود=بارك الله في رجالٍ تجمّع شورها
في هواء البل يبذلون الخساير والجهود=ما ثناهم عن هواها جمال قصورها
البل اللي جردٍ أرقابها واللون سود=كنّها مطعونةٍ لامشت فنحورها
طفّحن لحيانها زاهيه زين الخدود=تلفت أنظار العواريف بين حظورها
الأذان أذان ذيبٍ عن المال امحدود=والبدو لاوايق الرّيع شاف نشورها
والخشوم إلها عرانين لا مرّت تحود=كلّ فنسى يفتخر فاللقى مصطورها
والمشارب ظافية جارها الله مالحسود=والجروم كبار وأيضا طوال ظهورها
وبرةٍ فجحا العراقيب غاربها سنود=تنقل المعطان في جنبها بشعورها
عسم أياديها ولا درّبوها بالقيود=كلّ دارٍ لا أزهرت بشّرت بزهورها
خفّها خفّ الجمل وصفها وصفٍ يكود=شوفها للرّوح راحة وكلّ سرورها
المزاين لاثبت والجماهير الشّهود=تعجب اللجنة ويصفق لها جمهورها
هي غنات البدو يوم الكسايف والزّهود=درّّها زادٍ شروبٍ طوال شهورها
والدّواسر في هواء البل يسجّون الحدود=من على وقت الجهل في قديم عصورها
دونها بمصقّلٍ من تصاميم الهنود=وكل شلفى حدّها ورّده ممرورها
يوم قيمتها المنايا وظلمات اللحود=لابتي من دونها مثل عالي سورها
وفي زمان اليوم نعمة وقيمتها النّقود=عند أهلها عاليٍ سعرها ومقدورها
وما على باق القبايل على ماقلت زود=كم رجالٍ تذخر العز مع مذخورها
ونحمد الله كلّنا شعب باسم آل السّعود=هم سلاطين البلد درعها ونمورها
مثل ظلعٍ راسيٍ ما تهزّه كلّ نود=والبلاد كتاب رب البشر دستورها
ويا الله انّك تنصر الدّين وتخذل اليهود=والأعادي كيدها رجّعه فنحورها
وإسمحلي على إعادة تنسيق القصيدة
تقبل الود والتقدير
أخوك دغش البطي