السلام عليكم ورحمة الله وبركاته ،،،
القصيدة في غاية الجزالة ،،، أرجو أن تنال إعجابكم ،،،
القصيدة للشاعر/ مشبب العاصمي
فهيد هاك العلم واحفظه ذا السـاع=وارم القلم مـا هيـب لحيـة كتابـه
احفظ بيوتٍ جات من قلـب منـلاع=لوعـة كسيـرٍ حاوطتـه الذيـابـه
في صحصحٍ ما فيه حامي و فـزّاع=لا احتال فالممشا و عاقـه صوابـه
ودارت به الدنيا وضيّق بـه القـاع=وايضاً طرا لـه شـي زوّد عذابـه
طفلٍ خذا في الطول شبريـن وذراع=وتعثّـره فالمشـي طـارف ثيـابـه
فز و تعزوا لكن السـاق مـا طـاع=مـا عيّـن الاّ الذيـب كشّـر بنابـه
يابوك لاع القلب من وقتـه اوجـاع=اوجاع من وقتـه و سـرع اقتلابـه
يومٍ على يمّه و يـومٍ علـى ضيـاع=ما عاد يعرف للخطـا مـن صوابـه
قلّت به الشيمه من خداع فـاخـداع=كـلٍّ غـدا همّـه يـزود اكتسـابـه
رجلٍ طمع به لـو تناصحـه طمّـاع=عند الهلـل والقـرش يرهـن ثيابـه
لا من عطا لك مد طالبك في صـاع=بينه و بين المـال سـرق و نهابـه
رشوة ربا حيله حرامـي و قطّـاع=اقصى همومه كيـف يكثـر حسابـه
و ألعن من اللي راح مدمن و بيّـاع=دمّر عصب الامـه و دمّـر شبابـه
يا الله يا من ترشد العبـد لا ضـاع=انّـك تـدّلـه او تعـجّـل ذهـابـه
نرتاح منّه دام مـا هـوب منصـاع=ويجزاه رب الكـون باطـن ترابـه
وصنفٍ شبه رجال مشيـه تمريـاع=بالله يا اهـل الـراي وش ينبغابـه؟
خسارتٍ فالحمـل وولاد و رضـاع=الله يعظّـم اجـر مـن كـان جابـه
وصنفٍ سمرمد قاصر عزوم وذراع=يبشر بشين الكسب من هو غزا بـه
إخمام لا طاعه و لا هوب مطـواع=سيّـان فوجـوده و ساعـة غيـابـه
وصنفٍ ردي اخلاق وآداب و اطباع=فالنـاس لا يحشـم و لا لـه مهابـه
كريم فـي شـرّه و للخيـر منّـاع=خطرٍ مـن الخسّـه يسمّـم شرابـه
وصنفٍ منافق وجهه الوان و انـواع=يخدعك فـي نـوّه و لامـع سرابـه
لا جاك في وجهك ضحوكٍ و خضاع=ولا رحت منّه قـام يشحـذ حرابـه
حاسد و نمّـاكٍ و كـاذب و خـداع=أسأل عليـم السـر يهتـك حجابـه
لو هو بعيدٍ بان في كـل الاوضـاع=شكله دمـار و فـي فـواده خرابـه
حتّيش لو يذكـر و طاريـه ينشـاع=ما يدري ان العمـر تبـرك ركابـه
مركبه لا ابحر يدفعه موج و شـراع=وان صلفقت الامواج حـان انقلابـه
يا ما حـلا فالليـل يابـوك ذعـذاع=نودٍ تـداوي القلـب ممـا لجـا بـه
في خايعٍ من جاه شـرّاي مـا بـاع=يسج عن جـرح الزمـن و إلتهابـه
يا سين من هـم عارفيـنٍ للاسنـاع=حامين للمعـروف حضـرة جنابـه
ذولاك قلّـه نورهـم لـه تشعشـاع=مثل البدر لا بـان عقـب السحابـه
ويا وجد قلبٍ من عنا الوقت منـلاع=وجد الكسيـر اللـي حدتـه الذيابـه
وسلامتكم ،،، وتقبلوا خالص تحيات أخوكم ومحبكم في الله/ صالح الجعيدي