السلام عليكم:
اليكم هذه الوصيه للشاعر/محمد البلوي لابنائه
البارحـه قمـت اتفكـر بالحـرام وبالـحـلال =وصليت بالمسجد وقمت اقرا رياض الصالحيـن
والحمد لله بـان نـور الحـق مـا فيهـا جـدال=واللي تحرى الطيب يلقى الطيـب عنـد الطيبيـن
لكن من احداث الليالي جـا علـى بالـي سـؤال=ابغى اوصي عيالي عسى ربي على الدنيا يعيـن
ياعيالي انتم راس مالـي والوصيـة راس مـال=تـرى وصـاة الاب لازم يعتنـي فيهـا البنيـن
امسك ياسلطان الوصاة أنت الكبير مـن العيـال=والى كبر زايـد وخالـد عطهـم العلـم اليقيـن
ترى العمر لو طـال ياسلطـان قافيـه الـزوال=اوصيك بالاخـلاص والتقـوى وبـر الوالديـن
اخلص عملك لوجه ربك واجتنـب قيـلا وقـال=واحفظ لسانك قبل لايرميك فـي وسـط الكميـن
صل الصلاة بوقتها واشرب مـن المـي الـزلال=واليا سمعت مطوع الحـارة يـؤذن قـول آميـن
صوم رمضان وحج مكة يـوم شديـت الرحـال=وادفـع زكـاة المـال للمحتـاج او للعاملـيـن
واوصيك عن كثر الجدال بمجلس اكرام السبـال =والى جلست بمجلس اهل المعرفة خلـك فطيـن
كثر الحكي والضحك يسمج صاحبه علمـاً يقـال=قالـوه عطـران اللحـا لعيالهـم مـن هالسنيـن
واسهر على كسب المعالي والهدف صعب المنال=ترى الولد ماله وجه من غير علـم وغيـر ديـن
واوصيك لاتمشي مع اللي دربهـم ماهـو عـدال=واجلس مع الصالح ترى الاقران في حكم القرين
وابعد عن اهل الغدر واهل الكذب واهل الاحتيال=ترى الولد فـي نيتـه يغلـب علـى ابـو نيتيـن
واحذر من اهل الغش وارباح الربا سحت وضلال=مال الربـا لابـد مايفنـى لـو انـه بعـد حيـن
واوصيك لاتشهد شهـادة زور تطرحـك النعـال=والحق يرضي طالبيـن الحـق واشهـوده اثنيـن
واوصيك عن درب الخيانة لو عليك الوقت مـال=والى عاهدت اوف العهد خلك على الميثاق أميـن
ترى الامانـه حمـل جايـر ماتحملهـا الجبـال=لكن تحملها ابـن حـوى لانـه مـن الجاهليـن
واوصيك في وصل القرابه والمعـزة بالوصـال=ترى الولد من غير ربعه مثـل مكتـوف اليديـن
وادمح خطاهم لو تجي بين الكـلاوي والطحـال=الصبر مفتـاح الفـرج حكمـة قالوهـا الاوليـن
واحذر خويك لاتجيه الشمـس وانتـه بالظـلال=ترى الخوي والجار حقه بين خشم وبيـن عيـن
والضيف يشرح خاطره طيب النبا وسمح القبـال=قـدم لـه الثنتيـن وامـا الثالثـه رأس السميـن
واحذر يراودك الغـرور وثـم تنبـذك الرجـال=ويصير تقديرك ضعيف وتخسر احدى الحسنييـن
واحسب حساب المخطية والصايبة في كل حـال=ماينفعـك هـرج الشماتـه لااستقـرت بالجبيـن
كان القمر من منزله عود على السـاري هـلال=مافيه داعي يحتريـه اللـي سـرى حتـى يبيـن
اللي بعرفه غـر خمـن مبهـرة صفـر الـدلال=عنده خسـارة مـدت الفنجـال بالكـف اليميـن
كـلا بفعلـه والولـد مابيـن جـده والـخـوال=واللي قطع ساس ولده يسهـج عليـه ابالحصيـن
ايامنا فيها اختـلاف وصـار بالوضـع انحـلال=متخالط الاصلي مع التقليد صار الصنـع صيـن
بعض الشباب ابعد عن الواقع وطاش مع الخيـال=حطوا عوايد ربعهم في وسط ماء وحثـال طيـن
تلقـى بعضهـم بالشـوارع لاشمـاغ ولاعقـال=ويقلـدون احـلام وأسمـاء بالشعـر والفازليـن
قلته وانا مانـي وكيـل آدم لكـن حـل المجـال=شيـاً يحـز بخاطـري والله يعيـن الصابـريـن
آخر زمن صار الشهر يحسب مثل عشر الليـال=ايامنا تركـض وتمشـي فـوق ميـة واربعيـن
يـاالله حسـن الخاتمـة قبـل الفنـا والارتحـال=ويـاالله تعتقـنـا وتهديـنـا دلـيـل الفالحـيـن
تمت وصلـى الله علـى شفيعنـا يـوم الهـوال=محمد المبعوث لاهـل الحـق سيـد المرسليـن
آمل ان تنال اعجاب الجميع
اخوكم/ذيب المساري