هذه مرثية الشاعر الكبير عبدالله بن حمير آل سابر الدوسري في جدي الشيخ إبراهيم بن عبدالله بن جحيش آل وديان الدوسري أمير جماعة آل وديان من آل سويلم الوداعين رحمه الله رحمة واسعة وأسكنه فسيح جناته.
الموت حق ولا عن الموت محجوب=والعمر مهمـا طـال لابـد زايـل
الله حكـم لابـن آدم يـوم مكتـوب=لاحـان مـا رده جميـع الوسايـل
رجل إلى من مات يموت في جوب=ماهـوب مفقـود ولا عنـه سايـل
ورجل إلى من غيب الموت محسوب=يجي لموته حـزن يجلـب ملايـل
مثل ابو عايض فرجته تجرح قلوب=امثاله فـي الدنيـا أي والله قلايـل
دين وجـود وفوقهـا زود محبـوب=وذرب من خيار الرجـال الدلايـل
يبكيه من جاله مـن الهـم مكـروب=مركـا وملجـا مايبـي لـه دلايـل
ويبكيه مغبون مـن الديـن مطلـوب=يبشر يفكه مـن العسـر والغلايـل
ويبكيه بيت دايـم الـدوم مرغـوب=علـى الطريـق مشـرع للجمايـل
في الندى من كل الانفال منصـوب=نيل على ما يحتـوي مـن جلايـل
ويبكيه حب المرجلة حب موهـوب=أيضـا ويبكنـه عفـاف الحـلايـل
ويبكيه ربعـه والأجانيـب لا لـوب=عضيدهم في الحـل ذرب الفعايـل
هذا ابو عايض للصعيبـات منـدوب=لا قال قـول تـم مـا كـان قايـل
مخلوق فيه من الغريبـات عـذروب=كل المكارم حاز وافـي الخصايـل
ليته يشوف اللي لفوا ساعة النـوب=في البيت وردوا للتعـازي هوايـل
ما مات لا ما مات حي ولا هـوب=من موتته موتـة هزيـل الرحايـل
وراه أسود في القسا تقضي النـوب=اللي نعتهـم مـن شيـوخ القبايـل
وذكر جميل طاف للشرق وغـروب=مشى الجهات بحسن ذكر الشمايـل
يالله ياسامـع دعـا كربـة أيــوب=يامنشـي النـو وأمطـر مخـايـل
تبرد ثرى قبره وتغفـر لـه ذنـوب=اللي ذكـر بالخيـر شيـخ النفايـل
آمين ثـم آميـن وآميـن مضـروب=في دعوة له فـي جنـان الظلايـل
هذا العزاء قدمت في طاهر الثـوب=من شاعر عـزا بحـزن الرسايـل
عبدالله بن حمير آل سابر الدوسري
اللدام 3/4/1426هـ
نقلها لكم أخوكم إبراهيم بن عايض بن إبراهيم بن جحيش آل وديان الدوسري