::: مـنتدى قبيلـة الـدواسـر الـرسمي ::: - قصائد عدة للشاعر/ سعد بن سبيل

- :: قسم الـشعر العــام :: (http://alduwaser.org/vb/forumdisplay.php?f=16)

- - قصائد عدة للشاعر/ سعد بن سبيل (http://alduwaser.org/vb/showthread.php?t=9556)

قصائد عدة للشاعر/ سعد بن سبيل

الشاعر سعدبن سبّيل

يقول من فكـر و شـاف التهاويـل=مالي على بعض الأمـور إستطاعـه
في ديرتي يا لابتـي طافـح الكيـل=و الوضع منه الضغط زاد إرتفاعـه
أصور الواقع على العـدل و الميـل=على اللحـاف يمـد كـل ٍ كراعـه
و السالفه من دون قاصر و تطويـل=العيـب بالأوضـاع و إلا الجماعـة
مدري ورانـا قاطعيـن المواصيـل=حزنالمرتبـة الشـرف بالقطـاعـه
نلهث بلا يمـه و لا مـن محاصيـل=لا رأس مـال و لا كسبنـا طماعـه
واقع و لايحتـاج شـرح ٍ و تحليـل=و لمحرفين القـول عنـدي مناعـه
و لانيب مضطـر ٍ لبـاق التفاصيـل=و لا شامت ٍ و لا إخلقـت الإشاعـة
يا وين جلسات السمـر و التعاليـل=و سوالف أهل الجود و أهل الشجاعه
إلى إجتمعنـا ليلـة ٍ يسمـج الليـل=ما نترك (الريموت) لوربـع ساعـة
و لاعاد للفنجال نكهـه مـع الهيـل=مثلـي عليـه الوقـت لاو ٍ ذراعـه
سبحان مخلف طبع بعض الرجاجيـل=و إلا البعض هذي من أصلا طباعـه
و الله عليـم ٍ باللـيـال المقابـيـل=و الخافـي الأيـام تكشـف قناعـه
و صلاة ربي عـد منـش المخاييـل=على شفيـع الخلـق يـوم الشفاعـه

نعنبوك ريال ماتكثرالا مع رخـوم=ماتجمدفي رصيدالرجال الطيبيـن
تستلذ السجن عند الذي فيك محروم=ولايفك قيـودك الاعيـال الميتيـن

ودعتك اللـي ماالتجينـا الا لـه=الواحد الفرد الصمد عالـم الغيـب
وقبل الوداع أفهم لفحوىالرساله=تراك وأنا أبوك من منقع الطيـب
أناغذيتك راجـي ٍ منـك طالـه=واليوم راحت لحيتـي كلها شيـب
أوصيك تقـوى الله رب الجلالـه=وخلك محـل ٍ للثقـه للمعازيـب
أد الفروض وراع حق الزمالـه=وأحفظ ملفك لايجي به غثاريـب
وأحفظ لسانك عن كلام الحثالـه=ولا تارد الا صافيـات المشاريـب
كـل ٍ بمنطوقـه لسانـه عقالـه=والثرثره هي رأس كل العذاريب
واللي مقفي عنـك مـاك ومالـه=لاتسمع النمه وشـذب العراقيـب
خلك رجل واسلك دروب الرجاله=ولاترافق اللي ماتحسب العواقيب
وخلك مع أخوياك راعي جمالـه=حسن علاقاتك بكل الأصاحيـب
وخلك مطيع ألأمرفي كل حالـه=تنفيذ الأوامر ترى ما بـهـاعـيـب
من لاصبر يفصـل ويلقى بدالـه=ولا يصمد الا مذرب ٍ كنـه الذيـب
والحر يشهر بالخضيـراء لحالـه=ولا يأكل الا ما تحـوش المخاليـب
خطو الولد وقـت الرخا والشكالـه=يشمل بطيبه للأهـل والأجانيـب
وخطو الولد راجيه ياخبـث فالـه=ماهوب كفو ولا يعرف المواجيب
ومن لايعلمـه الزمـن عزي تالـه=ترى حيـاتـك كلبوها تجـاريـب
ويالله ياللـي كـل حـي يسألـه=يحفضك حفاظ السماء بالشواهيب
وصلات ربي عد هلـت هلالـه=على رسول ٍرتب الديـن ترتيـب

يا بوعجايب فـي زمـان العجايـب=شفت العجايب و العجب و التعاجيب
وقت ٍ محيّر يـا عطيـب الضرايـب=و أنت الفهيم اللي مضى له تجاريـب
خطو الولد وقت الرخاء و النوايـب=يزداد طيب و منقعـه منقـع الطيـب
و خطو الولد خايب و راجيه خايـب=ما هوب كفو و لا يعرف المواجيـب
و الطيب من رب الخلايـق وهايـب=ما هوب بالقوه و ضرب المشاعيـب
و الوقـت مـا يخـلا بليـا شوايـب=لازم يكـدر صافيـات المشـريـب
وقت ٍ غدى قطـه و فـاره حبايـب=و الشاة من دون العشاء تطرد الذيـب
و من بطش الأرنب عوّد الصقر هايب=و البوم صارت له وكور و مخاليـب
و أنا أعرف ان لكل شـي ٍ سبايـب=و لافيه مخلوق ٍ خلي ٍ مـن العيـب
لكن شفـت الهجـر بيـن القرايـب=و مجالس النمه و شـذب العراقيـب
كم لابة ٍ صارت حـزوب و كتايـب=و على المحـارم يأمنـون الأجانيـب
و بعض الرفاقه ما بعرفـه كسايـب=ينقاد مثل اللي بحـوش القصاصيـب
و الحسـد مـا تفيـد فيـه الطبايـب=و تضيع مع موت الضمير التطابيـب
و أزريت أميز بين مخطي و صايـب=و لا عاد أعرف الخادم من المعازيب
ناس ٍ تـذرى عـن سمـوم الهبايـب=و ناس ٍ بدنياهـا تصـال اللواهيـب
و كم طفلة ٍ بالغصب زفـة لشايـب=و كم عانس ٍ عنها تـرد الخطاطيـب
و كم فاجـر يعيـش علـى النهايـب=و تكثر على قليـل مـال العذاريـب
و كم فاعل ٍ معروف طـاح بنشايـب=و كم نذل لبت له جميـع المطاليـب
و في عالم العشاق شفـت الغرايـب=تمثيل و خيانـه و غـدر ٍ و تكذيـب
و حظي ثوى و أصبح معوق و عايب=ضعفت عزومه دون شك ٍ و لا ريب
في عالم المجهـول رجـواي غايـب=و ما تخفي الأيام فـي عالـم الغيـب
شـرارة الحرمـان شبـت شبايـب=و لا نيب سالي دون سيد الرعابيـب
راع الهوى للحـب يدفـع ضرايـب=و يا عزتـي لـه لاوثـق بالمناديـب
و القلب مدمن عشق ماهـوب تايـب=أزريـت حاولتـه بكـل الأسالـيـب
مـا دام قبـري ماعلتـه النصـايـب=عن الهوى مالـي مفـر و مجانيـب
الله يجبـرك مـن جميـع المصايـب=دارت بي الأفكار مـن دون ترتيـب
و اسلم و سلـم ياعريـب النسايـب=و اقبل تحيه من ضميري و ترحيـب
اعداد مـا هلـت حقـوق السحايـب=و اعداد مـا خـط القلـم للكتاتيـب

وسلامتكم ،، وتقبلوا خالص التحيات ،،،