ياليل خذني على سطح القمر دوره= واترك نجومك تحتنا مع لياليها
واتركني اغوص بين الشعر وبحوره= عندي قصيده ولا ادري وش قوافيها
قصيدة ترمي الشاعر على زوره= تسعين ليله ولا يقدر يسويها
قصيدة واسمها ياهاجسي نوره= لب المسمى ولب اللي مسميها
لعيونها الشعر والشاعر وجمهوره= تعاندوا في رضاها من يراضيها
لكنها ماتلد العين مغروره =من حقها جعلهم فدوة مواطيها
ترفه وغنجه ومياسه وغندوره= واذا انتها الزين منها جاك يبديها
لجات تخطى شوي شوي معذوره =الارض من تحتها تحسب خطاويها
وان طبت الروض الاخضر طارت طيوره= نص يجي فوقها ونص حواليها
وبخدوده الزعفران يجدد جذوره =فديت الزعفران اللي بخديها
في ثغرها الشهد ودع زاهي زهوره= مستوطن ثغرها معذور باغيها
اليا اضحكت صارت القيعان ممطوره= واليا بكت ردت السحب لمناشيها