تغنيت باسم اعجيم جدي وجدي يام = ومن ديرة الدامر بأسوق القدم يمه
إلى وادي العود الفحل دوسر الضرغام = راعي الوادي المسمي مهو وادي الرمه
ظنا زايد وتغلب اتحط العلوم أقسام = كلام عليه الحلف والنذر والذمه
لهم صفحة التاريخ تهرج عن الأيام = ولهم ترفع البيضا على قمة القمه
تعنا الشريف لدارهم معتليه اعرام = وردت عزاويه بعد جورهم يمه
تعدا القبايل ساكنه يبتحص قدام = وبعد ما وصلهم قصوا أشنابه وكمه
فهم مزبن الساطي وهم ملتجا المنضام = وهم فزعة المضهود هم نقوة الأمه
وهم ملتقا الهاشل وهم نصرة الإسلام = وهم مدت المحتاج هم للخوي دمه
وهم حكمة المجلس وهم عزوة الزهام = وهم ضحكة الصحبان هم للعدو غمه
وصاة الرسول ابجارهم طبقت بأحكام = وكنه يخص الدوسري خيرة الأمه
يسوقون جار البيت لو صابته الأسهام = ويدله غريب الدار معهم ولا همه
ووسم العصا ما أحدٍ سبقهم عليه اشمام = اهنا الفرق يا اللي تحفظ العلم و اتضمه
اهل البل حماة الغرس لو ركزت الأعلام = حما دارهم لو جرت الضد ملتمه
أبمدح الدواسر شرهتي تلحق الأقلام = وحبرك أبمدح الدوسري يا قلم شمه
يفوح العطر بكتابتك مع صبا لاأنسام = أهل المدح لهم المدح واللاش له ذمه
سلامي لديرتهم و اهلها سلام هيام = تحيات مشتاق للقاء طاوي العمه
تخصص تحياتي وليف الثنا الفصام = رفيق المراجل ولاوفا خالة وعمه
عشير الصعيبة والمدايح عليه أحيام = وتضماه لو ترواه واسمه لها جمه