يا مصيبيح سبّح بإسم ربك وقول: = أحمد اللي بعثني من ممات لحياه
يا مصيبيح هانت جعل عمرك يطول = لين تنسى كثر شوقك لطوق النجاه
ساعةٍ ما يحُول من الغرق ما يحُول = وكل موج يتكسّر جاه موج ٍ طماه
انء تلفتّ شفت البحرعرض ٍ وطول = مابه الا السما والقاع ما ابعَد مداه
وان تعزمت وين تروح .. ويش بتطول = وشوفة الناس من حولك تصارع مياه
وأمّ ترفع ضناها خايفه لا يزول = لاهي بسابحه ولا بيديها جداه
قالت اخذه وأخذته أنت من زود هَول = موقف ٍ ما يشوفه عاقل إلا بكاه
وغـءرقت توّ عينك من نزول لنزول = عينها للولد والنفس خذها الإله
حسبي الله على ساعه تخف العقول = وحسبي الله على موج البحر ويش جاه
يا مصيبيح ربك واحد وله رسول = باعثه بالهدى والحق للي دعاه
طمّن المؤمن انه لو يشوف المهُول = دامه آمن بربه واتكل ما علاه
وانت مؤمن ورجلٍ ترتكي للحُمول = اصبر اصبر ترا صبر المشقى دواه
الله الي بغاك تعيش حَول ٍ وحَول = لجل دايم تقول : الله وَلا سواه
احمده واشكره في كل يوم ٍ وقول: = جلّ منهو بعثني من ممات لحياه