http://www.alduwaser.org/Bsmllah.gif


الحمد لله رب العالمين والصلاة والسلام على سيد الانبياء والمرسلين سيدنا ونبينا محمد ابن عبدالله وعلى آله وصحبه ومن وآلاه ومن اهتدى بهديه واستن بسنته الى يوم الدين

إخواننا أعضاء وزوّار الموقع الرسمي لقبيلة الدواسر

http://www.alduwaser.org/up/pfiles/15752/5.png

http://www.alduwaser.org/up/pfiles/16623/53.jpg



( كثر اللغط هذه الايام عن قصة اول مزاين للضيوف وقصيدة دسمان السبيعي والدواسر وهذه القصه الحقيقيه باختصار لكي لانطيل عليكم )

قصة اول من حط مزاين للضيوف هم الدواسر في اول مزاين لهم في الرويكب وبسببها كتب الشاعر الكبير دسمان بن مناحي السبيعي قصيدته المشهوره التي تجسد هذا الفعل الطيب اللي سجل باسمهم :

يازين فعل يالدواسر فعلتوه
فعلن سبقتوا فيه كل القبايل

( في البيت الاول خلد الفعل الطيب بشهادته وشهادة بن عمه اللي شارك وجميع من حضر من القبائل الاخرى )

حتى لو ان الناس بعدين سووه
انتوا هله من قبل وانتو الاوايل

( وفي البيت الثاني يبين ان هذا السلم الطيب اللي ابتدعوه الدواسر ماراح يوقف بين القبايل ، ويثبت انكم هله من قبل وانتو اول من ابتدعه )

وقصة القصيده : كان بن دلمخ السبيعي بن عم دسمان
جاي من الوديان معه بكره للمشاركه في مزاين سبيع اللي قبل مزاين الدواسر ب ١٠ ايام ولكن لم تكتب له المشاركه في ذالك الوقت
ثم حضر بن دلمخ وعدد من القبائل الاخرى لحضور
مزاين الدواسر والذي قام بعدها بايام وبدعم من رجالات الدواسر وهم :


حمد بن منصور بن دغش الصخابره
معدي بن عبدالله المساعره
عبدالله بن فهاد الفصام
فهد بن فريج الشكره
شجاع بن قرموط المساعره
عمر بن فهد المخاريم ( عوضين ) رحمه الله
وعبدالله بن فرج الرواعيه
مترك بن فهد بن حمير ال بريك
سعد بن عبيد ال بريك رحمه الله
محمد بن مبارك بن زهران الحراجين
حمد بن عنيزان الخرفاني أل عمار
محمد بن سعود بن مشخص الغييثات

ومن حكم اشواط مزاين الضيوف :

شخبوط بن سعد المقابله
محمد بن راشد بن سبر الصخابره
طاحوس بن عيبان المساعره


وانتهى المزاين المخصص للدواسر ..
ولاحبوا يردون ضيفانهم بدون مايشاركون فابتدعوا هذا السلم الطيب الا وهو اشواط للضيوف

وفاز بن دلمخ السبيعي بالمركز الاول في احد اشواط الضيوف :
ونقل لابن عمه الشاعر دسمان بن مناحي ماحصل من الدواسر واحتفائهم بضيوفهم فهاضت قريحة الشاعر بهذه الابيات الجزله التي خلدت هذا السلم الطيب :


يــازيــن فــعـل يـالـدواسـر فـعـلـتوه
فـعـلن سـبـقتوا فـيـه كـل الـقبايل

حـتى لـو ان الـناس بـعدين سووه
انـتـوا هـله مـن قـبل وانـتو الاوايـل

قـلـتـوا كـــلام لـلـضـيوف وحـمـيتوه
وعـاداتكم بـا لـضيف فعل الجمايل

يــوم الـمزاين بـينكم مـا احـتكرتوه
مــاعـودوا ضـيـفـانكم بــا لـفـشايل

مـن كـان مـعه مشاركه ما منعتوه
مـاقـيـل ذا واجـــد وذولـــي قـلايـل

بـيـنـتوا الـعـلـم الـجـمـيل ورفـعـتوه
لـلـي يـحـسب ادقـاقـها والـجـلايل

تستاهلون الطيب يا اللي عملتوه
ويـفـوز بـالـطالات مــن كــل طـايـل

مـاهـمكم مـال الـعناء لـو جـمعتوه
مـابـاقـي إلا الـفـعل والـمـال زايــل

هــذا طـريـق لـلـنشامى رسـمتوه
إلا الـذي سـلمه عـن الطيب مايل

قـررتـوا الــدرب الـصـحيح وفـرضتوه
مـثـل الـقـلايد فـي رقـاب الأصـايل

شيلة القصيده :




وجاراه بن عمه ؛ راكان بن بدن السبيعي بقصيده
بعد مااعجبه الفعل الطيب ولاعليهم زود سبيع الغلبا ويقول فيها :

لــيـا دعــاكـم داعـــي الـطـيب لـبـوه
هــــذي عــوايــد كـاسـبـين الـنـفـايل

مايلحق الطّيب ورى الطيب مشروه
يـبـقى كــلام الـصـدق والـشك زايـل

ومـن يسفه زحول الرياجيل مسفوه
يــاعــل جــنـسـه فـالـرفـاقـه قــلايـل

وانــا دعِـيـت وجـيـت والـقـاف خـلـوه
عـنـدي وانــا راعـي الـبيوت الـجزايل

اطـــرب مــع الـقـيفان واســج واتــوه
واتـعب على الجزله بشت الوسائل

وصـونـي الـسـبعان والـشـعر وصــوه
فـانـه يـجـملني مــع اهــل الـجمايل

دواســـــرٍ راس الــطـويـل اعـتـلـيـتوه
سـلايـلـن مـتـسلسه مــن سـلايـل

الـيـا وقـفـتوا فــي الـلـزوم احـتميتوه
وافـعـالـكـم نــــدر لــيــا قــــال قــايــل

( قد قالها دسمان قبلي وانا اخوه )
هــذا الـكـلام الـلـي عـليه الـدلايل :

" يـاطـيب فـعـلن يـالـدواسر فـعـلتوه
فـعـلن سـبـقتوا فـيـه كــل الـقبايل "

حـتـى لــو ان الـنـاس بـعدين سـووه
انـتـم هـلـه مــن قـبل وانـتم الاوايـل

( اول مــزايــن يــالـدواسـر جـعـلـتـوه
اشـركـتوا الـضـيفان يـاهل الـفعايل )

حـتـى ولـدكـم مـن مـصيبته شـلتوه
يـــوم ان بــن عــواد شــاف الـهـوايل

زهـم زهـم وانـتم عـلى طول جيتوه
مـاحـالـكـم مـــن دون فـكـتـه حــايـل

خـمسه معا عشرين مليون سقتوه
وقــفـة شــرف تـبـرد كـبـودن غـلايـل

يـحـفظكم الـمـعبود مـن كـل مـكروه
امــيـن يـامـحـيي الــثـرى فـالـمخايل

مـاقلت غـير الصدق والكذب مشبوه
الــصـدق يـبـقـى يــارجـال الـحـمـايل

وخـتـامـهـا يـاطـيـب فـعـلـن فـعـلـتوه
فـعـلـن سـبـقـتوا فـيـه كــل الـقـبايل





ورد عليه عدد كبير من شعراء الدواسر لشكر دسمان على كلامه الطيب تجاه الدواسر من ضمنها قصيدة الشاعر نايف بن مسرع :

دن الـقلم لـي وناصع الطرس هاتوه
الــوقــت حــــان لـصـادقـات الـمـثـايل

هـاج الـقصيد وصـابني مـنه مشروه
ولا جــت مـواجـيبه يـجي لـه مـلايل

يـزمـر كـما حـر(ن) مـن الـوكر هـدوه
ولا كـمـا واد(ن) مــن الـغـيث سـايل

سـمـعتنا دسـمـان لا فــض لـه فـوه
وطــربـتـنـا لأبــيــاتـه الــلــي دلايــــل

يـجـبرني الـمـعنى عـلـى قـافية أوه
ولا تــرى لـي فـي قـصيدك مـسايل

مدحك بربعي يافتى الجود سمعوه
وتــفـاخـروا بــــه يــاكـريـم الـسـلايـل

تثني على اللي طيّب الفعل سنّوه
وتـــوارثــوه مــــن الــجــدود الأوايــــل

آلاد زايــد مــن شـكـى الـضـيم لـبّوه
ويــفـرح بــهـم مـنـهـو زمـانـه تـمـايل

والــطـيـب فــنـجـال إلا مــنـه صــبّـوه
يـنـسـاق لـلـي يـكـسبون الـجـمايل

ورجــم الـمـعالي يـاسـبيعي رقـيتوه
وسـاع الـبشوت وكـاملين الـخصايل

وبـافـعالكم ثــوب الـمـراجل لـبستوه
وأشـبـاهـكم بــيـن الـقـبـايل قــلايـل

يـقـوله الـلـي شـاف... مـاقال قـالوه
وعـاشـر نـشـاماً يـكـسبون الـطوايل

حـازوا عـلى الفعل الجميل وتحاموه
وتــمـيـزوا بـالـطـيـب بــيــن الـقـبـايل

وهــذا جـوابـي يـاهل الـعرف حـطوه
فـي صـفحة(ن) فـيها تـخط الـفعايل



ولازال هذا العلم الطيب منذ ان بداء عند قبيلة الدواسر
الى يومنا هذا لم ينقطع عند باقي القبايل الا وهو تخصيص اشواط للضيوف عند اقامة اي مزاين
هذا ماحبينا ايضاحه لانها كثرت الاقاويل في هذه القصه



والقصه ثبتها العلم الطيب ونقلت من عدة رواة واشخاص من ضمنهم شاعر القصيده : دسمان بن مناحي السبيعي


(صوت قبيلة الدواسر)
موقع قبيلة الدواسر الرسمي
www.alduwaser.org/vb