::: مـنتدى قبيلـة الـدواسـر الـرسمي ::: - حرٍ شهر من ماكر غرب الأفلاج

- :: قسم قصايد مدح وفخـر في الــدواسـر :: (http://alduwaser.org/vb/forumdisplay.php?f=37)

- - حرٍ شهر من ماكر غرب الأفلاج (http://alduwaser.org/vb/showthread.php?t=68163)

حرٍ شهر من ماكر غرب الأفلاج

السلام عليكم ورحمة الله وبركاته:
اسعد الله اوقاتكم بالخير والمسرات

http://www.alduwaser.org/up/pfiles/1...0fa796692f.jpg

http://www.alduwaser.org/up/pfiles/4346/DSC_0166.JPG
هذه أبيات مدح للشاعر نايف بن مسرع في ابن العم/ مشلح بن عايض النتيفات أثناء حفله التكريمي الوفي لزميله الشاعر/ فراج أبو لسان السبيعي:-

بنات فكر الشاعر لضيقه علاج
يسلى بها لا عكّر الوقت جوّه

لامن سرا برق الهواجيس لعاج
وقام يتثعّـل في المعاليق نوّه

حوّل على صدره من الوبل ثجاج
خالف به أحزانه والأفراح توّه

ويدرا بها الشاعر مشاريه وإحراج
في ساعةٍ يحسَـب حضوره حموّه

وإن طوّقه تقدير الأجواد بسياج
ماله على دفع المشاريه قوّة

وفي لازم أهل الطيب يظهر وينباج
ويجرّي إللي بالثمين يتفوّه

يامرحبا ياسبيع ماكبّر الحاج
بإسم المحبة والغلا والأخوة

ويامرحبا ياسبيع ماطافت أفواج
بإسم المعرفة والنسب والعنوّة

يامرحبا ياسبيع في حفل فراج
الشاعر الكفو المجيد المفوّه

لسانٍ من الغلبا له الذوق محتاج
في ساحةٍ فيها الفرايد تشوّه

كلٍ غدا شاعر وناقد وهراج
لين إحفروا لـ منادِم الروح هوّة

وكلن غدا شيخٍ وفارس وسهاج
وماباقي إلا يدعون النبوة

كلامٍ يلفّق وأخير إسمه إزعاج
إختار عنه الذوق وأهله جلوّة

أذواق جمهور الأدب جاء لها خلاج
وقامت على ماضي سنينه تأوّه

ولا أنت يافراج وأمثالك سراج
للملهِمَـة والمرجلة والمروّة

يامرحبا والشوق في الصدر وهّاج
وفي عيوننا لمشاهدتكم ضموّه

عند العديم إللي لبس للفخر تاج
حرٍ شعم للعز والطيب ضوِّه

إللي بنى ذالليل للطالة أبراج
جسورها طنخة وشيمة وخوّة

مشلح رسم للطيب والعز منهاج
مسجلٍ بإسمه وبصمة سموِّه

فاخر يافراج السبيعي بـ هداج
وإنا فخرنا فيه ماهوب توّه

حرٍ شهر من ماكرٍ غرب الافلاج
ماكر حرارٍ والمناسب علوّه

منه إعبروا عشاقة الحكم الأمواج
ورفّت بيارقهم بعزمٍ وقوة

في الدولتين إللي نبا حكمها راج
بدت من الهدار جدّ وربوّه

حقايقٍ ماهي سواليف ديباج
شواهدٍ حية وفيها طروّة

دارٍ صدور بيوتها دون مزلاج
وفي روس أهلها للمراجل رهوّة

لاد الجميلي لا إحتمى للزمن صاج
تاطا على الكايد وفيها جروّة

طيب الجميلي كنه الصبح لا إنباج
يشوق مطلاعة وينشاف ضوّه

وزبدة كلامي يا أبيض الوجه فراج
وأنت الكفو وأنت الأديب المفوّه

لاقامت إرقاب الرياجيل تنعاج
وكلن طرقها بين كثره وشوّه

وقّف وقل فراج وأخوي فراج
لو إن ماني فالأسامي متوّه

يفرِّج الكربة إلى زاد الإحراج
وأنا حزامه لا إنتخابي ونوّه

هو دوسري وأنا سبيعي مايحتاج
لكن ضربنا أروع معاني الأخوة