بسم الذي بأمره تهب الهباهيب = الواحد المعبود جلا جلاله
احمده ربي واشكره عد ما تغيب = شمس النهار وعد ممسي لياله
اعداد ما هلت مزون(ن) نواصيب = وما لاح براق(ن) بعالي اخياله
وما سيلت وديانها والاداعيب = احمده حمداً وافياً والثناء له
وسلام(ن) احلى من لبن شمخ النيب = وسم(ن) رعت في ظل مدلل حلاله
وسم(ن) تخالط عقب مزن(ن) سواكيب = هلت على ريضانها مع اسهاله
لشيخ(ن) بعزمه شال حمل المواجيب= لا حل حمل(ن) للمواجيب شاله
ابراهيم ابن شتوي حصان الاطاليب = اللي سنام المجد بالعزم طاله
بالعزم والهمة وقهر الاصاعيب = حاش المراجل كلها وارتكاله
حر(ن) سلايل حر عطب المضاريب = بعيد طلع ووافيات(ن) افعاله
يوفي الفعول بحنكته والتجاريب = دليل راي لمن يريد الدلاله
بالنعم عدى في رفيع المراقيب = وبفعل المراجل طايلات(ن) حباله
جده ضمين الرجال سقم الحواريب = وسم العصا سلمه وسيع(ن) اظلاله
مدخل جريس ما فيه شك ولا ريب = انه مريح البال يوم التجأ له
حامي احدوده بالسيوف المحاديب = يحمي الحدود وناطح(ن) كل عاله
عامر ابن بدران واف التراحيب = الضيغمي عد الفعايل مقاله
قوله من الاكباش ما احصيت تحسيب = وثمانين فاطر قدمه له بحاله
وكثر لهم مع زودهم بالمزاهيب = مزاهب(ن) عجزت تشيله اجماله
واليوم لي حق(ن) اسوق التراتيب = وكل(ن) على رايه يوجه مثاله
ومثالنا باللي حوى كامل الطيب = ريف الضيوف وريف منهو عناله
من طيب فعله نفتخر كل ما جيب = وسط المجالس طارياً للرجاله
حيث ان ابن شتوي قبل يظهر الشيب = في عارضه والمرجلة راس ماله
بتوفيق من هو يعلم السر والغيب = شامخ طموحه بقمة الطيب ناله
بفعايل(ن) تسر كل الاصاحيب = وربي جعل درب التوافيق فاله
انا اشهد انه لو تشح المشاريب = يوصف على هداج في كل حاله
شيخ(ن) نذر نفسه لكل الاقاريب = وعن حال من حوله كثير(ن) سؤاله
شيخ(ن) جعل همه وكل المكاسيب = جمع(ن) لعيال العم يثمر وصاله
وقت اللوازم للبدارين ما يغيب = دايم لها حاضر بحاله وماله
فعل(ن) مثل فعله بعيد(ن) عن العيب = فعل الرجال اهل الكرم والشكاله
مثله لفعل الطيب دايم معازيب = والطيب وهبه والمراجل مجاله
هو شوق زينات البني الرعابيب = اللي سبت كل العقول بجماله
اللي عيونه ناعسات مهاديب = والخد برق(ن) بالظلام اشتعاله
هو شوقهن طيب(ن) وعرق ومجاذيب = معرب(ن) ما بين عمه وخاله
من ماكر(ن) في عاليات الشخانيب = ماكر حرار(ن) في شوامخ جباله
دواسر(ن) على المراجل محاضيب = من نسل ابن بدران رفيع السلالة
بالفعل حطوا بالمعالي مقاضيب= بدارين اعلوم الطيب كله مناله
بدارين في وقت السنين الشلاهيب = رست بوقت ٍ ما يطاق احتماله
بالعسر منصا لاهل الفطر الشيب = ومنصا الضعيف ومن تردت حواله
وزبن الدخيل وقاهرين المغاليب= والفعل يبرز صاحبه من خلاله
من عصر ابن بدران تهيب ولا تهيب = ساس الشجاعة تحتمي كل قاله
خوال الملوك اهل السيوف المعاطيب = ستر العذارا كاسبين النفالة
وابراهيم ابن شتوي بكثر المواهيب = يبقى ذخر لاهل الفعل والجزاله
على الظفر له هدة كنه الذيب = متبين(ن) ولا يجيها اختاله
عند المواجب دايم(ن) له اساليب = لا هابها غيره تخير اثقاله
مع البذل والجود له راي(ن) مصيب = فيه اجتمع راي وكريمه اسباله
واعداد ما خطت حروف المكاتيب = وبقدر ما ضمت حروف الرسالة
واعداد ما تنمي غصون(ن) نبانيب = على النبي صليت والصحب وآله