زحمة هجوس الروس واذعان الاذهان=بلواً تلوا مع هل الشعر دايم
تبغا صبيٍ لابدا لازمه بان=يسرح ويمرح مايعرف الهزايم
في حفل ابن طاقان والوقت منّان=عطني قلم بكتب قصيد ووسايم
الشعر نحتاجه ونجتاحه احيان=ودايم مزاجه بين رايم وشايم
ومادامها مابين مشعل وسلطان=هذي طروقه في يدينا خدايم
هذا ولد هذا خصايل وعرفان=اسمين ساجت فالثريا خرايم
والمدح له بابٍ وله فيك بيبان=ولـ الصمت فوجيه الرياجيل لايم
يامرحباً من قلب واحساس والسان=يبقى علمها طول الايام قايم
تقرا ملامحها على مر الازمان=وتشوفها في وقت حذف العمايم
ابوك ياطا المستحيله وتنهان=ويرفع بعزمه باردين العزايم
كفّه تصب الجود وتنبّت احسان=وصفّه مع العليا توايم توايم
ولادارت الدنيا ووجه العدوا شان=يُرجع طويلين اليماني هلايم
ماكن سلطانٍ خلق غير سلطان=في عصرنا والا العصورالقدايم
وانته وريث المجد قارب وربان=ضلعٍ اصفوحه فوق من زام زايم
سلطان والمنديل جابوك برهان=من عرّب المنسب فدتك الشتايم
وهذا انت في جيلك للابطال نيشان=الاسم مشعل والخصايل غنايم
مالك من الالقاب الا كحيلان=تجبر عزا المظيوم وترد ظايم
العيب يلطم وجنته عنك خذلان=والطيب يربط بـ احرف اسمك عزايم
ودام الجميله والتعب دايم اخوان=الله يقوينا علي الطيب دايم

اللهم إنا خضعنا لك وطعنا=والخضوع لربنا.. راس الكرامة
أنت الأعظم وأنت الأكرم وإن طمعنا=نطمع إنك تجيرنا يوم القيامة
إستعناك وعبدناك وخضعنا=وإبتدى عبدك بتعظيمك كلامه
وإن شرينا مع هل الجزلة وبعنا=الله إنه يلحق الشاعر مرامه
لإحترام الذوق نبذل ما استطعنا=وإن مدحنا مامدحنا كود قامة
ياسمو الشعر سرّ الليل معنا=في حضور إللي لبس للمجد خامة
ليلةٍ فيها الهجوس الشرد تعنى=بالكلام إللي مايِلحَق به ملامة
ماحفظنا من قصيد ومابدعنا= يفتخر لا لبّسه مشعل وسامه
ياولد سلطان تشريفك دفعنا=للمقام إللي يشرفنا مقامـه
مرحبا ياللي قبل شوفه سمعنا=عن نباه إللي فرض فيه إحترامه
من خصالك ويش نحصي لو جمعنا=طيب راس.. وجود يمنى.. واستقامة
إبتدينا.. وإنتهينا.. وإقتنعنا=إن سجايا أبوك في وجهك علامة
لو زمن حاتم بحاتمنا جمعنا=يبصم لسلطان وتوقّع إبهامه
وإن رحل سلطان وفراقه فجعنا=مارحل مادمت حلياه ومقامه
يالاميــــر إللـى عطــى للطيـــب معنــى=طيـب عــمّ.. وطيـب خال.. وطيـب هامه
مـن كُبــر قــدرك علـى الحـب اجتمعنـا=مرحبـا بـك ياوريــث أهـــل الـزعــامــة
ياحفيد إللي بهداته شبعنا=عقب رمح وسيف وسروج ومسامة
في زمانٍ لو بقينا فيه ضعنا=والجهل من بيننا بنّا خيامه
طوح معزي بصوته واستمعنا=وإحتزم للكايدة.. وإنا حزامه
لين جاورنا الثريا وارتفعنا=واستطالت روسنا حد الغمامة
في البلاد إللي لعزتها اندفعنا=حاكم ومحكوم.. من دون الكرامة
يشهد التاريخ لامنا رجعنا =دارنا من دونها عصب العمامة
لو ظمينا في صحاريها وجعنا=تبشر من أهل المطامع بالسلامة
مرحبا يامن عطيت الطيب معنى=طيب عم وطيب خال وطيب هامـة
من كبر قدرك حضرنا واجتمعنا=ياوريث المجد.. وبشوت الزعـامة