أنا بختصر وأشرح لك الوضع في كم بيت=ياللي يذكرون إنك تنشد عن أخباري
ليا من دعاني ونعم بالندى لبّيت=ومن باعني بعته ولا نيب له شاري
وعن مجلس النمام والدعوجي صديت=أجنب عنه حتى ولو كان هو جاري
وأعز الخوي واحفظ جمايله ما حييت=وأفاخر بفعله بين لجواد وأماري
وإذا جاني الواشي سفهته ولا رديت=على كلمته لنّي بمضمونها داري
ومن مدّ لي كف الوفا بالوفا مديت=وبشي مهو بيخصني مشْغل أفكاري
وعلى رزق غيري يش ما كان ما لديت=وراضي بكل اللي من الله علي جاري
وعن الحق ووجيه الرجاجيل ما قفيت=ولا أقدر اللية ما عرف حق مقداري
وعندي تهون أقول للمخطي أنت أخطيت=ولا أقول للمخطي خذ القوس يا باري
ليا ضاق صدري خذت مشعابي اِو سجيت=أسج القدم دامه على سجتي ضاري
في أرض خلا ما داج بَرْكانها الشميت=اللي يفرح بعثراتي ويفشي أسراري
أداريك يا جرحٍ من العام ما شاويت=يشين الجروح الي تناقض على الطاري
وأسليك يا قلبي بيمكن وليت وليت=ولعل وعسى وأشكي همومي على الباري