::: مـنتدى قبيلـة الـدواسـر الـرسمي ::: - العادات والتقاليد .. الجزء الثاني

- :: قسم المـواضيع الـعامــة :: (http://alduwaser.org/vb/forumdisplay.php?f=2)

- - العادات والتقاليد .. الجزء الثاني (http://alduwaser.org/vb/showthread.php?t=65536)

العادات والتقاليد .. الجزء الثاني

بسم الله الرحمن الرحيم
السلام عليكم ورحمة الله وبركاته

المقدمة :

(( مسكينه يابنت البدو أكثر البنات تزوجوا الا انتي جالسه في البيت :( ))

الموضوع :

(( الحجر ))

تتواصل المشكله وتزيد التعقيدات في الزواج بين ابناء القبائل وهذي المره بتكلم عن موضوع ( الحجر )
أكثر ما اسمع هذي الكلمه في النقاشات دايم يقولون ( انت مخك محجر )
واحيان اسمعها عند سواقين التريلات لما يفضى خزان الهوى تحّجر الكفرات ولاتمشي السياره :)

من اسم الكلمة اصلاً تحس بالتخلف ...

يقول الرسول صلى الله عليه وسلم في الحديث الشريف

(( إذا جاءكم من ترضون دينه وخلقه فأنكحوه إلا تفعلوه تكن فتنة في الأرض وفسادٌ كبير )) رواه الترمذي

أختلفت انا ومجموعه من ابناء العمومه حول هذا الموضوع البعض يقول هذي العادات والتقاليد البنت اذا قرعها ولد عمها أي حجرها خلاص ما تتزوج غيره !

طيب اذا كان ولد عمها غير جاد في الزواج وخّلى البنت معلقه لا تزوجها ولا خلاها تروح في نصيبها , وزود على ذالك ان ولد عمها داشر وسربوت وكل العلوم الرديه فيه , وياليت عزيزي القارء تحط نفسك على سبيل المثال ان هذي البنت اختك او بنتك ... مثلاً

هل تقبل تزوجها واحد اساساً غير جاد في الزواج فقط عنده حب التملك !
وهل تقبل تزوجها هذا الداشر السربوت اللي لاوظيفه ولا علوم مرجله !
وهل تقبل ان تضيّع شباب هذي البنت في رجا هذا الشاب المستهتر واللي مافيه امل يتوب او يتغير !

إذا كنت تقبل لأختك او بنتك هذا الحال فهذا شي راجع لك وانت حر خلك على العادات والتقاليد وذنب هذي البنت في رقبتك .

واذا كنت لا تقبل فانا اشكرك جزيل الشكر على وعيك ورحمتك لهذي المخلوقه اللي مثلها مثل كل البنات عندها أحساس ومشاعر
بس المسكينه تخاف و تستحي ولا تقدر تتكلم .

وفي النهاية ارجع واقول :
( مسكينه يابنت البدو أكثر البنات تزوجوا الا انتي جالسه تحت رحمة العادات والتقاليد )

سُبْحَانَكَ اللَّهُمَّ وَبِحَمْدِكَ أَشْهَدُ أَنْ لا إِلهَ إِلأَ انْتَ أَسْتَغْفِرُكَ وَأَتْوبُ إِلَيْكَ.

تقبلوا تحياتي ودمتم بخير ,,