يالله طلبناك حظ يبري العله=انت الكريم المهيمن الواحد العالي
لك الثنى والمدايح والولا كله=انشد انك عظيم الملك يا والي
اطلبك في ليل غيثن راعده زله=بارقه فوق الغمام السود متلالي
تمطر بوادي الدواسر وتسقي الحله=في سبعة ايام وادي الجود سيالي
اهل الجفان ورجال الرمح والسله=صون العذارى وهم حمايت التالي
ارض التمر والجمر والعود والدله=الاد زايد ليوث المرقب العالي
دوسر ملا نجد معه البيرق اشله=الاوس والخزرج انصار النبي الغالي
وانساب صقر الجزيرة ناصر المله=كم من زعيم يقول الدوسري خالي
وقمة المجد لابن اقويد محتله=وانقلت مران قالوا طيب الفالي
شبل الاسد مثل ابوه يعيش في ظله=على شداد(ن) من الامجاد متوالي
شيخت شجاعة وجود ومجلس وفله=مهيب شيخت اختوم وبشت وعقالي
لشيخنا المطلق الاشواق مفتله=ابو محمد شبيه اسهيل متلالي
ياعالم الجيل كم من جاهل دله=صاحب دليل وبيان ومنطق حالي
حبه بقلبي قديم محبة فالله=ياجل شخصه وهو دايم على بالي

اهدي سلامي لشيخ العلم والمله=يشكرك جمع الدواسر كل رجالي
يشكرك شيخ(ن) على العادات من حله=قصيدة جبتها كالسكر الحالي
واجب علينا نرد الشكر ونجله=والشكر موصول لك يا شيخنا الغالي
درس وعانق جبال طويق وحتله=بعلمه اللي نفعبه كل جهالي
والمال لجل الفقارى ينفقه كله=ماهو من اللي يصر القرش وريالي
مسخر الوقت لجل الدين ما مله=يقرا ويتعب على العدلات ما مالي
والطيب واجب علينا طبع وجبله=من عصرنا الاول وفي عصرنا التالي
والعود الازرق يباري الهيل بالدله=وسوالف العز والتاريخ بقوالي
والكل يدرا لسانه مايجي الزله=يرفع مقامه من النمه ونقالي
هذي واجد نعد ومنتهى لله=مسجله والحقايق عدل تنقالي
وابختصر في كلامي وانهي الشله=حنا عمى عين حساد(ن) وعيالي

المشاركة الأصلية كتبت بواسطة ابو حسين الدوسري (المشاركة 737311) صح السانك يبو حمد واعتلى شانك بالله انك شوشلي يذيبان بيض الله وجهك قصيده جزله من راس جزل ويستحق الشيخ الجليل لاهنت يالقرم على هالقصيده الشامخه احترامي وتقديري

المشاركة الأصلية كتبت بواسطة فهد الغريري (المشاركة 737385) صح الله السانك يابوحمد وافي جعلك عمرك طويل ومني لك الود والتقدير