مساكم الله بالرضى والخير يالجمع الغفير = ياللي لكم في خاطري أسمى المعزة والقدر
من فرحتي بمقابلتكم أمشي وكني أطير = إلين ماوقفت بمكاني هنا وكلي فخر
يالله ياشعري فزعتك اليوم هذا يوم غير = وإن ماحضرت بشيءٍ يجمل فجعلك ما تحضر
عبر عن اللي داخل فوادي ومكنون الضمير = لربعي أهل وادي الدواسر كلهم بدو وحضر
عطر مسامعهم بشعرٍ ينتشي منه العبير = وأقطف لهم من أجمل أنواع الزهر باقة شعر
مضمونها كل عام وأنتم بألف صحة وألف خير = والله يبارك عيدكم من عقب مازل الشهر
شهر العتق والمغفرة والصوم والخير الكثير= شهر البذل والجود والمصحف وترتيل السور
يالله عسانا انعتقنا فيه من نار السعير = ويالله عسى دعواتنابه وافقت ليلة قدر
سبحانه الدايم وشهر الصوم من طبعه قصير = أمسٍ نبارك في الشهر واليوم في عيد الفطر
عيدٍ سعيد وفرحته ماهي بالثوب الحرير = أو كشخة ورزة وترسيمة وتنسيف الغتر
العيد فرحة وابتسامة للغني وللفقير = ماهوب لأصحاب الدراهم والمناصب محتكر
العيد لمّة أقربا يجمعهم البيت الكبير = ازعاجٍ وزجمة ولكن آه ياوسع الصدر
العيد جمعة أصدقا وتقابلوا جزّة عصير = من بعد مافرق بعضهم عن بعض ظرف وسفر
العيد فرصة للتزاور بينك وبين القصير = اللي موصينا عليهم سيدنا خير البشر
العيد جبرة خاطر اللي خاطره دايم كسير = كلن يحاول يجبر بخاطرْه ويزيل الكدر
العيد شمعة في طريق الوصل والعشرة تنير=تجدد اللي قد مضى وتذكر اللي ماذكر
العيد في وظل للي عايشٍ وسط الهجير = سحابةٍ تمظر لمن يرجي من الله المطر
العيد ماء عذبٍ فراتٍ سلسبيلٍ من غير = يروي المحبة بيننا ويلين قلوبٍ حجر
العيد بتغى العيد شوف العيد في الطفل الصغير= من ليلته مبسوط مستانس ويتحرا الخبر
ينام بدري ويحضن أشياءه ولا يطول سهير= ويصحى ويصحي العيد والعالم مع آذان الفجر
عجل يتوضى ويزبن الأول ماهو الصف الأخير = ويرجع لبيته ويتكشخ ويتعطر بالعطر
يحب راس أمه وأبوه ويدعي الرب القدير = يالله طلبتك مد أبويه وأمي بطول العمر
ياتي مصلى العيد من قده تقول إنه أمير = جالس مابين أبوه وأخوانٍ يشد بهم ظهر
وإذا رجع بيته بسرعة ينزوي تحت السرير = مخبي طراطيعه عسى الله يحفظه من كل شر
وتجمعوا أطفال لكن ماحدٍ منهم يغير = وسوالفٍ الله تقطر من براءتها طهر
يقنع ولو عيديته اريال أو حلوى وعصير = يفخر إذا قالوا رجل ويضيق لاقالوا بزر
إي والله إنه رجل لامن صاح صياح ونذير = يدوس ساحات الخطر لادق ناقوس الخطر
جده وأبوه أهل الوفا وهو على خطاهم يسير = يبيع عمره لجل دين ولجل فخاقٍ خضر
اللي جمعنا كلبونا ايها الجمع الغفير = ولي الشرف لاجيت أعايدكم بأبيات الشعر
ويني ووينك يا أبو الطيب وحسان وجرير = لكن عسى شعري يجملني بعين اللي حضر