الله يعز المملكه منبع الخير =في ظل عبدالله سنين طويله
العاهل اللي سطر المجد تسطير =نعلن ولانا له على اية وسيله
والشجره اللي يوم لفح الهواجير =تضفي علينا بالغصون الضليله
حكام نجد اهل السيوف البواتير= سوٍ على من ضيع الله دليله
قوم لهم فالكون قوه وتاثير =وتفرض على عدوانها المستحيله
وحيا الله الزوار حشمة وتقدير=ومهما نهلي نعتبرها قليله
في ملتقى الخضران فرحه وتعبير= الملتقى اللي عزوتي تنتميله
حان التلاقي واستماع التعابير =ومن الجدايد جيتكم بالجزيله
احوفها واخذ عليها مشاوير= والسمل يبقى هناك عدله وميله
حتى ايلامن جات قدم الجماهير=الى هي تجملني وتظهر جميله
في مجلس اللي طور الحفل تطوير=والى بدا اللازم يمثل قبيله
من دون ربعه يرتكي للمخاسير =كم واحدٍ لاثقل حمله يشيله
وعينه لكسب المدح من يومه اصغير= ويعرف بكسب الكايده والجزيله
والى اشتهر بين القبايل مشاهير =والحمل يظهر له جمالا تشيله
منهو لها غيره يحمل القناطير =ويرخي متونه للحمول الثقيله
يا حمود طيبك دمر الهم تدمير = تدمير برجين انيوورك الطويله
ابوك اخو جزلا (1)يصد الطوابير= يوم المعارك واشتعال الفتيله
يفرح به المضهود لازعزع خضير =لامن اعتلى الشقراء الجواد الاصيله
ومن لابتٍ لاجا اختلاف الاشاوير =لاد الخضيري محتمين الدبيله
لاطوحت بالصوت عند المظاهير = يردون حوض الموت ورد النهيله
لاجا نهارٍ فيه سبار ومغير = عادات ربعي يكسبون النفيله
حريبهم لاشافهم عقله يطير = مثل الخريش يجض من كل زيله
من غير نقصٍ فالقبايل وتقصير= لو تكشف التاريخ تلقى دليله
اصل العرب للمدح مثل المداوير= من ربعنا ولا من اية قبيله
وحنا الدواسر نصخر المجد تصخير =وسلومنا بين القبايل مهيله
وحنا من الفرجان واخذ التقارير = لادرهمة من بينهم بالشليله
الى اعتزينا في حسن رفرف الطير = اما ذبحنا الشيخ ولامثيله
كم شيخ قومٍ جندلوه المناعير = لذيب الاسحم والضباع تحبيله
لاجابه الله حاديته المقادير= خلي لعكفات المخالب تشيله
دون الجهام نكسر اعظاه تكسير = بمشوكن يبري الكبود العليله
حنا هل البل مبعدين المصافير = ترعا الجديد اللي تبرشغ دويله
مصفارها في عثثٍ له نواوير = شرق من العارض وغرب العبيله
وان بكر الوسمس على ديرة مطير = ديرة مروية السيوف الصقيله
تنحي على الصمان وقت المخاضير = ترعا نباته مابعد جف سيله
والخاتمه مني صلاةٍ وتكبير = على الرسول اللي دعا للفضيله