إهداء لجميع الأحبة
قصيدة قلتها في الشيخ / مران بن متعب آل قويد وإخوانه
وأتمنى بأن تحوز على الاستحسان من ذائقتكم

بسم الله أبدي مبدعي بالفرايد=جزايلن تزهي بحس الترانيم
وصلاة ربي عد هزم الرعايد=على النبي المصطفى بالتعاظيم
حمداك ربي ياصدوق الوعايد=ورحماك لي ولوالديْ والمغانيم
قم ياهجوسي فز ترجم جداديد=وارسم مشاعر فايقات وتناغيم
خلك مع المقدي قدا وامتحايد=تقيَّد بأمري وإليك التعاليم
إحذر!تشط لصوب شط القرايد=وحذرا تربَّق في خطوط المساقيم
يمِّم على حصنن حماه ابن زايد=وانحر شيوخن عشقها بالمجاهيم
من لاد قاد مطوِّعين الشرايد=ما اخصُّهم إلا بحق ومعاليم
ولاَّ فترى كل العرب فالعوايد= لهم ركاز وكار عز وتعاميم
سلِّم على شيخن يسوق الرفايد= من يوم بقعا قاع صِفر ومعاديم
فارس وأمير وشيخ حل العقايد=مدهال عز ورز خز ومحاشيم
شيَّال حمل وشال شمل الكوايد=ويا فطين اذهن وحذرا التعاتيم
عان رايته بيضا وتروم النجايد=وبسيرته غنوا شيوخ ومفاطيم
أخذ العلم ماهوب علم الجرايد=عنّز على ( مُرَّان ) وانس التراهيم
مُرَّان يعني: مُرّ كبد الحقايد=يحل عقدتها بحلو المراهيم
مُرَّان صُعط مصعّطين المكايد=من صرّ فك وماتفيد التكاميم
مُرَّان أبو زابن ونعم السنايد= جاه الوجيه البيض ملفا المعازيم
عضده قوي وأنعم بهم من عضايد= قومن لهم في المجد قسم وتقاسيم
وأخص أبو تركي شوير السدايد= ( متعب ) ذهين الفكر رأي وتحاكيم
حكيم قوم وفرَّسته الشدايد=فراستن تقدح بفكر وتلاهيم
وإلى احتمى الماقف وحامي الوقايد=ماغير أبو تركي يسوس المفاهيم
يمناه أبو مطحس وسيع البنايد= ( زابن ) زبينه بشّره بالتكاريم
عوين من ظالت عليه الضهايد= ظلّه كما ديوان نصر المظاليم
وجه الوجيه البيض ود الودايد= خُلص النقا وروح التقى به مواسيم
و( سلطان ) يامال النعيم الرغايد= للجنة الخضراء نعيم وتناعيم
ما خلَّف إلا مقلطين الموايد=للضيف والطرقي وراع الملازيم
عميدهم شيخ الوفاء والمجايد= ( مُرّان ابن سلطان) شبل الضياغيم
أنعم بهم وأكرم بهم من عمايد=ياطيبهم! وأبصم بعشر الأباهيم
ماهوب توٍّي كسبهم للحمايد= لا والله إلا الطيب فيهم مقاديم
ولاقلتها بجني وراها فوايد=إلا تنوماسي بربعي الأكاريم
نفسي عزيزة ماتروم النقايد= وأنا ولد ( غانم ) وملفا المغانيم
ضابط مظلٍّي مدفعي حُر قايد=ماني من اللي لانطق له لعاثيم
من مكتنز فكري تخيل القصايد=تطرب لها نفوس النشاما الصماصيم
أنظم قصيدي من حرار الخرايد=جواهر وتزهى بحسن المناظيم
ملبوسها العفة وضافي القلايد=ومرسومها يصدر بأمر ومراسيم
ومن لايقدر جود راعي الرجايد= فأبرك له يلبس حجول وخماخيم
وختامها عنبر ومسك وزبايد= هدو وطيب وفال حسن الخواتيم

عبدالرحمن الجبابرة
25-07-2010 م
الرياض