سلام رديه على بـــحر الــــــعرب = وانته يابن قضعان سباح البـــــحر
يما تجيب من البــحر دره ثميـــن = والا تجيب من البحر وجبة عــــــشا
ارسلتلك مرسولنا حسب الطلب = لكن طال الوقت ماجــــانـــــا خبـــــر
واليا صبرنا يا معين الصابرين = ماصابر الا مايريد الــــلــــه واشـــــــا
يامرحبا ترحيبة مثل الذهب = بالشاعر اللي صاير ضـــابــــط خــــــفر
والى سكن عين البراحه والقرين = يدري عن اللي ســـاكن دار الرشا
يالعازمي تبت يدين ابو لهب = لكـــــن لا يدريبــــــها زيــــد وعـــــمر
والارنب اللي مالها الا نصف عين = صارت نصيب الطرقي اللي ما مشا
ضيدان بن منصور مفتول الشنب = لكن لا يزعل على نــــــايـــف صقر
ماله طريق لا يسار ولا يمين = بين الضلوع اللي على وجــــه الحشـــا
الصمت حكمه والصحيح من الادب = ان احترام الرجل لثـــــاني فـــخر
وانا عطيتك فالبدايه كلمتين = وان قلت كررها ما اكـــــــررها حشا
ياحبيب والموضوع مشروه وعتب = وانتبه تبي توليعها مــــوت حمر
لكن طعني لا تضر المسلمين = ياناصر الواشي ليا منـــــــــــــه وشا
الكلمتين اخفاف والمطلب وجيه = لو يستحي وجه الغنـــــاه من الفقر
واللي يدور فالحويه جغمتين = ماهوب لاقي لا محـــــــــال ولا رشـا
ترى الرضا يغلق شرايين الغضب = مثل السلامه تنزع جـــــذور الخطر
وبليس رايه يقسم الواحد ثنين = ويحرض الراشي على اللي ما ارتشا
فزعت بالمنشار ابا قص الخشب = واثر الخشب يابس وديكوره خضـر
يلي وردت العد وين العد وين = يمكن من السرعه على عينك غشـــا
حاسبت ياحبيب بعد طاح الحطب = لو تعتذر ما عاد نقــــــــبلك عذر
لكن هذا فعل دورات السنين = يلي تصلون الفجر قبل العـــــــــــشا
ياللي تعجب ماعلى الدنيا عجب = لو ينشب المنشار فغصون الشجر
وان كان ما بقالك الا شجرتين = لعل يسقيها السحاب اللي نــــــشا