صلو على النبي
يا بنت يا اللي تدغشين القوانين=الزّين ما يعطيك حق و ذريعه
كانك مزاجيّه فحنّا مجانييييين=لأتفه سبب من صد عنّا نبيعه
ماهوب بلا نقضي الدّين بالدين=ماني مجازيكم بحكم الشّريعه
لا خربت الرّصّه وصار اللغا شين=أحوسها ثم يقتفيها قطيعه
وآجب حبك من خفوق وشرايين=من دون بنج ولا فريق الرّبيعه
يا بنت ما عمري تبعت المقفّين=طبعي وكل انسان عنده طبيعه
روحي وايلا ما خاب ظني بتلقين=جبوٍ على لاماك نفسه دنيعه
وليا تفارقنا فلانيب مسكين=أبكي على حبك وكبدي وجيعه
بأروح عند مدلهات السلاطين=وأضرب بها جوٍ فجوجه وسيعه
وأسج منك ومن هموم وبلادين=ناسٍ تليكع تحسبنها لكيعه
واللي طلبتيناه من قبل تقفين=جاكم دبل والعذل مانيب أطيعه
للين سهلينٍ وللعي عيّين=والحر ما يرضى لنفسه هزيعه