زهمني هجوس الشعر من خاطرٍ شفقان=يسوقه على جزل المثل صادق شعوره
يقول احتزم للطيب و اضرب على النيشان=جزيل المعاني وقته اليوم و حضوره
و انا لا بغيت اللعب ما احترْت في القيفان=خيالي يصوغ من أجزل الشعر باكورِه
على الطيب و الطيّب نسوقه بدون عنان=على اللي فعوله في المواجيب مشهوره
لك البيِض يا هذّال ترفع على ما بان=على النّير و العارض و سلمى و مزبوره
جزاك الرّضى من خالق الكون و الغفران=كسبت النّعم من كل من طالت شبوره
كفيت و وفيت و شِمْت و آمنت يا كحيلان=و جبرت النفوس اللي من الضّيم مكسوره
في الآيه رقم ستّين من سورة الرّحمن=رجيت الثواب و لِنت و النفس مسروره
عسى الله يجازيك بحسانيك بالإحسان=على ما عفيت و يغفر الذنب و قصوره
نقلت الحمول اللي على أهل الحمول أحزان=و بهجت النفوس و نزغة ابليس مدحوره
ترى ما حصل غلطة جهل قادها الشيطان=و لا من وقف له مؤمنٍ ينتهي دوره
الا من وقف له بالمواقف طليق أيمان=يحب الصلاه و يكره ابليس و شروره
و لا هي غريبه وقفة الطيب يا بليهان=مَدامك من اللي تمّن الجار من جوره
عياضيّة لا كلّح الناب للنّيبان=تضد الحفيف و تدهش حماه و تزوره
اهل سربةٍ من حربها تشبع العقبان=على كل مزغافٍ من الصوت مذعوره
دواسر كواسر تدّي الجار بالمجّان=من جدارها لا طاح ما هيب معذوره
دواسر لهم في الطيب مبنىً رفيع و شان=هل الغرس و أهل البلّ و الأفعال مخبوره
ثعوا في الشريف و راح عقب السِطر منهان=يبي ابن مطرّف ثورة و إحتسى الثوره
على الشرّ سيفٍ ينسف الرّاس من الأمتان=و على الخير و أهل الخير بالخير مأموره
على اللي زبنهم جنّة سلمها بستان=وسوم العصا للي شكى الخوف مذكوره
و يا مرحبا و اعداد ما ينشي الودّان=تراحيب بدوٍ بالحيا تشكي دهوره
بعد ما لفاهم طارشٍ بشّر البدوان=يقول أبشروا بالسّيل في ظامي دهوره
نووا و إنتووا و أقفوا من العد و المقطان= مشوا في هوى السرفات و القاع ممطوره
و تراحيب من هو بالعفو بشّره سجّان=عطاه القرار و شاف من نسخته صوره
هلا و مرحبا و اعداد ما غاب نجم و بان=بكم يالقروم اللي لكم بالوفا دوره
غياثين لا من ثار وسط الرّمك دخّان=من آلاد مرّه لا اعتلوا كلّ ممروره
صناديد يام ان ساقوا الخيل في الميدان=يبيعون غالي الروح و الروس مسطوره
و حنّا قبل هذي و هم في الأمور اخوان=و لا نستمع هرج الدّويني و لا شوره
و كل القبايل حقّها وافيٍ مليان=لهم يشهد التاريخ و تعبّر سطوره
و انا بأحمد الله لابتي للوفا عنوان=هل الطيب و الناموس من ماضي عصوره
دواسر عزيزٍ جارها و الفعول سمان=وصاة الرسول اللي على الجار مبروره
عسى الله يثبّتنا على الحقّ و الإيمان=و عسى الله يعزّ الدين و الدار منصوره
على منهج السنّه و ما شرّع القرآن=تحت راية التوحيد و شعار أخو نوره

صحح لسااانك واعتلىىى شااانكُ
ولاهنت على القصيده الجزله يا القرم