نسعى ورزق الله وساعـن دروبـه=مهوب عند الي يصكـون الابـواب
يـذري علينـا مثـل ذاري هبوبـة=ياكثر مايعطي وياكثـر مـا جـاب
لو تقف حساد البشـر مـا غدوبـه=يجي ليـا راد الولـي يفتـح البـاب
رزقي على محي البلد مـن سحوبـه=محي هشيم القشع نـوة ليـا صـاب
درب العطـا الحسـاد مـا وقفوبـه=نبذل سبب والرزق ياتي بالاسبـاب
بعض الخلايـق لاتغـرك سلوبـه=احذر من الي صجته صجـة الـداب
من عاش في الدنيا يشوف العجوبـة=يشوف له صاحي وصادق وكـذاب
لو صار في بعض المواقف صعوبة=نصبر على صعب المواقف والاتعاب
تبا المراجـل مـن يشمـر بثوبـه=على الرجولة والمراجـل وهوشـاب
والشكر للي واجـب الشكـر دوبـه=منزل سبا وآيات طاها والاحـزاب
ولاخيـب البـاري عبـاد لجوبـه=من يلتجي لمقسم الرزق مـا خـاب
يارب تغفر مـن لجـا لـك بتوبـة=يطلبك من رحمتك يا خيـر وهـاب
يـا ساتـر الخـلاة تستـر عيوبـه=ليا جا نهار فيـه تشديـد وحسـاب
يا سعد مـن ذاك النهـار كسبوبـه=جعلهم ربـي عـن النـار مجنـاب