استعدي ياهجوسي واستريحي في طقوسي ماشريتك من فلوسي لجل جمهورً غفير=قوّ باس وعصْر فكْر وصرف ماس ودُرّ بكْر وطيب راس وطيب ذكْر بفضْل رزّاقً غفور
آتعلّى سرج قبّا وآتقنّص ما تغبّا عن عيون اللي تنبّا وأبونواس وجرير=مايجفنّ المنابع والمحابر والمطابع دوم والغيث امتتابع من سما الفكر الوقور
مع جميع اللي تقدّم والمزون اللي تردّم فالتواضع ماتهدّم ساسه الراسخ عسير=الحكي ماهوب يغني والفتى ماهوب يجني غير صيته يوم يبني مجده بقلبً جسور
والنباهه والمهاره والفراسه والوجاهه والنعاره والرياسه طاعة الفرد القدير=من يطيع الله يعَصمه من مكايد فكر خصمه ولْه فالتاريخ بصمه عند وافين الشبور
والسياسه خبث نفس وذا عدوّ الأمس صاحب هكذا والعكس بالعكس ووجَه داري سفير=السعودية تسامح كل طامح للتسامح لو دفن شين الملامح خلف بسمات الثغور
زلة الطيّب تمشّى قدْر والخيّب ربيب الغدْر ماضيّق فسيح الصدْر بالهرج الحقير=نسهجه وندحرجه حتى يضيّع مخرجه ويشوف ماذا ينتجه نطح الغنم صلب الصخور
البدو ماهازوا احماها ولا وردوا على ماها ومرعاها مجوس إيران بالسيف الشطير=فيدهم بث الإشاعات بفضائيات نايل سات والصملات لقلوب الذيابه والنمور
علّموا الليبي معمّر والصليبي يوم خمّر ماشحنّا من تذمّر و اصنع ارهاب الغرير=الخطايا والدنايا دونها جيوش وسرايا والحمايا في دما شعب السعودية تفور
البلد في ظلّ أبوفيصل فهد بعد ( الصمد) لو خان بشّار الأسد وألغى السفاره والسفير=والدواسر رهن إشاره للمليك وللوزاره والوفا نرفع شعاره من قديمات العصور
لابةً لي زايديّة تغلبيّة دوسريّة تارد احياض المنيّة ما يشدّدها النذير=نصطفق صفق البحور ونهوي اهواي الصقور ونلطم الجمع الهدور وكلّ مختالً فخور
سلّ سيف وزرق رمح وريف ضيف وعسف جمْح وخير كيف وشرّ قَمْح للغاوين والماقف خطير=للخوي نعم العضود وللعدو سمّ الكبود وللوطن نحمي الحدود وشفّنا جنّة وحور