::: مـنتدى قبيلـة الـدواسـر الـرسمي ::: - نصيحة(4) للشاعر راشد بن ناصر آل دويس الودعاني

بسم الله الرحمن الرحيم
هذه قصيدة في النصح والتوجيه
للشاعر: راشد بن ناصر بن صقر آل دويس الودعاني
النفس في حكــم خالقهـــا ومفنيـــــها *** تمشي على ما فرض في كل الأحوالي
أحســابها المنـــتظر بـــآخر ليـاليـهـا *** في ساعة إلي عليها القـــبر ينهـــالي
يا ابن آدم أنظر حياتـــك وش قافيـهـا *** كـــفر ذنــوبك بتــســـبيح وهـــلالي
خمس الفرايض وصــاتي لا تـخلـيها *** ذي سنة سنــــها الأول على التـــالي
صلاتك إلي فرضــها الله تصلـيهــــا *** وتحج وتصوم لمَّن صرت رجـــالي
زكاة نفسك على المـــطلوب تاديـهــا *** فرض من الله تزكي النفس والمـالي
أبوك عزه واجــب الأم ترضـيهـــــا *** وصل بالأرحام تكتب لك بالأعمالي
لك مدةً من حــلالك يوم تـعطيـــهــا *** وأحسن بالأيتام وأجعلها على البالي
أسلوم الأجــواد يا للي جاهـلاً فيـهــا *** كرامة الضيف والجــيران والخـالي
خوة خـويك عــلى النـفس تــبديــهـــا *** والعم لـه عنـــدنا قـــدرً ومنـــزالي
صحبت رفيق الشرف ما نيب ناسيها *** والـحــق حط ابن عمك دايم غـالي
قـدم سلامـــك على نفــــس تــــلاقيها *** تحــــيةً سنـــها لك ربـــك الـــوالي
حــقوق الإنسان ناخـــذها ونعطيـــهـا *** نمشي على الحق ما حن بجهـــالي
دنياك من واجــبك تــفهم مـــعانيــــها *** ما تذكر إلا بخلق وذرب الأفعـالي
مادم نفـــس الفــتى حظـــه يباريــــها *** تاتيه الأرزاق من دفَّـاع الأجـــالي
صلو عـلى المصطفى عدد ذواريـــها *** عليه صلوا عدد ما هــلّ همـــــالي