اليوم يابوكم مسيري على الهون=وقــّـفت وقـفة يابسات الغصوني
عاثـيـت بالدنيا معاثـاة مجنون=وأركبت منها ما تقضـّـت شطوني
يا فطيس أنا اوصيك يوم انت بـ تكون= أظنّ بك بالطيب .. وإنت الزبوني
تمـّـوا الصلاة التي تساعد على العون= صلــّّــوا وزكــّــوا كانكم تسمعوني
تدرون باللي يترك الفرض ملعون= صوموا وحجـّـوا ربكم تفلحوني
وحيـّـوا الطروش اللي من البعد يلفون= وإضحك مع ضيفانكم .. يضحكوني
وباكر إليا جوك تراهم بيمشون= حاذرك في ضيفانكم .. تفشلوني
وخل القصير بعازته .. كنه ممنون= و لدّ النظر من عورته والعيوني
وأمش لخويك يا حبيبي على الهون=ترى الخوي ينشال فوق المتوني
وحط الزبـيـن برفـــّــة البيت مآمون=أوصيك يا إبني لا تصير مغبوني
وغطــّــوا على العايل .. شفا كل مسنون= وإعزم على الحايل .. تراها تفوني
إما تموت بعزّ والناس يفنون= وإلا تغـطرف بالفرح واللحـــوني
يا ونـّــتي ونـّـــة طريح .. ضحى الكون= داجوا عليه .. موسعين الطعوني
يزهم .. وربعه بين طاعن ومطعون=خلوه مثل مهــتــّـــشات الشنوني
نادوني الشايب عسى ما يشيبـــون= وسمـّــوني إسم ثاني وأحزنوني
إسمي يعرفونه .. فلا شك .. يخطون= شافوا لوايح عارضي .. وإبتلوني
الشيب ماهو عيب .. والناس يدرون= العيب ... حق الخايـنـيـن العفوني
من أول صيدي سمان ومتكون= واليوم لا فزيت له .. يضحكوني
وإذا لقـفـتـه راح يمشي على الهون=سيـّـــور ماهبــــّــــــت هبوبه سكوني
الله يقاصيهم بــ قدر ما يسوون= كيف قطعوا سلمي .. وكيف أنكروني