::: مـنتدى قبيلـة الـدواسـر الـرسمي ::: - ملفاه للرجبان ساعة وصوله

- :: قسم قصايد مدح وفخـر في الــدواسـر :: (http://alduwaser.org/vb/forumdisplay.php?f=37)

- - ملفاه للرجبان ساعة وصوله (http://alduwaser.org/vb/showthread.php?t=40453)

ملفاه للرجبان ساعة وصوله

بسم الله الرحمن الرحيم

عنوان القصيدة
" ملفاه للرجبان ساعة وصوله "

مناسبة القصيدة : تبادل التكريم وتعزيز الصداقة بين الشاعر منيع مرزوق فهد الذيابي الروقي
وصديقه الشيخ شجاع بن محمد بن مجدل الرجباني الدوسري
إنه واعتزازاً بهذه القبيلة التي هي بمثابة رأس الرمح في نجد وأقل ما أصفهم به
فإنهم دولة تحت ظل دولة

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,, ,

يا راكب اللي بالغ في كمولــــه
مع زين شكله راحة للمسافــر

جيب عباقرت اليابان اخلصولـــه
وبنوه بنيت محكمين الظمايـر

حسين وجه منسق في ميولــــه
وسطابه الخلفي عريض وكاسر

شيخ لبس بشته وربعه عنولــــه
شخصية بسكات تنهي وتأمــر

على الفقير اليوم صعب حصولــه
ما يشتريه من العرب غير تأجر

مركب هوامير الذهب والسيولـــه
اللي لهم في سوق الأسهم متاجر

من ديرة أم الدوم وجه رسولـــه
الجدي خلفه عن سهيل امتيـاسر

مهوي كما أهواي الصقور العجولـه
لا هو بلا مجنب ولا هو بجادر

متوجه يم الدواسر نزولـــــه
وراعيه ماله فالمحطات خاطـر

هواه في الوادي وناص زحولـــه
ما قدم عينه غير واد الدواسـر

واد عليه من الملامح كهولــــه
وفيه للري الصناعي محــاور

ملفاه للرجبان ساعة وصولــــه
في بيت شيخ ما يحسب الخسايـر

شيخ من الرجبان بانت افعولـــه
شجاع أبو تركي علي الطيب قادر
كريم يزها الطيب فعله وزولـــه
خطل اليمين إن جاء نهار التناحر

يرتاح من جاله وينسى أعضولــه
في مجلس دايم من الناس عامــر

اثنى على اللي طيبات أوصولــه
ويثني عليه من العرب كل زايـر

وهنا من الشباب شايب رجولـــه
قد عاصر الدنيا على كل ظامـر

كريم سبلاً كل شامخ يطولــــه
صمعان حلال الامور العسايــر

وغيرهم عقبان صوله وجولـــه
دواسر يؤمن بهم كل كافــــر

لقيتلي دولة تحت ظل دولــــة
في وادياً زرع ونخيل وعمايــر

جنوب هضبة نجد هامة بطولـــه
شجعان وهل للكرم والتفاخـــر

فالواجبات المال ما حسبولــــه
وبصحونهم يفدع ظهر كل عـاقر

هم حاكمة واد الدواسر انزولـــه
يفخر بهم واد من الخير زاهــر

واد من الخــيرات خضر سهولـه
في ديرة ابن اقويد شيخ الدواسـر

نادر حراراً فــاز في كل صولـه
وقبيلته نــوادر مــن نــوادر

عدوهم تكبر عليـــه الحمــوله
لو هو طويل امساء من الذل قاصر

وصديقهم عنه الحــمول امحمـوله
ولو هو صغير أصبح من العز كابر

نجد ابتسم يـوم الدواسر لفولـــه
اخوان شما المعتلين الكواســـر

طريحهم يعـيش بالسقم حولـــه
وكسيرهم ما ينوجد له جبايـــر

يا ويل خصم في اللقا ناحرولـــه
عاثر ومن يمشي مماشيه عاثـــر

تاريـخهم في نجد يوم انز حولــه
يحكي عن الأبطال فعل ومآثـــر

حكا لهم نجد العذي وحكولــــه
وصاروا كما نجم على نجد ظاهر

إلـهم بتاريخ الجــزيرة فحولــه
عقبان ضد وكابر نسل كابــــر

أهل كرم من جالهم رحبولـــــه
جنابهم من كل الأدناس طاهـــر

نزح لهم شالح وجاهم وجولــــه
الجار نعم ونعم ذاك المجـــاور

يوم شالح عزوته ما ارسلولــــه
وقت اجتماع بينهم بالتشــــاور

شالح لقي عند الدواسر قبولــــه
بعد نزوحه من ديار الخنــــافر

يا عنك ما مالت بشالح عدولــــه
أصبح بعد كسر الجناحين جابـــر

وابن مطرف جالهم وفزعولــــه
ينخا الدواسر يا رجال المحاضــر

جا لآل زايد ينتخي ونتخولــــه
وصدوا عنه سهم العدو المخاطــر

أصبح بمان عايش في كفولــــه
ما يشتكي من ضيم الأيام زاجــر

خلوا كبــود المعتدين امعلولـه
كم واحد عنهم من الذل نايــــر

فنظارهم كل المتاعـب سهـــوله
والذل حطوله وراهم مقابـــــر

عقالهم يثنون في كل صو لــــه
وجها لهم عقال عند المحاضـــر

أسلاله تأصلة من حمولــــــه
فريس حرب وللمجالس عنابـــر

عنهم ردي الحض تقصر أخيولــه
وبهم كسير العظم يرقي المعاسـر

أنتم سنام الطيب وأنتم قبولــــه
أهل العقيدة للمساجد منابــــر

مرحوم جد جابهم وان تمولـــه
في أول زمانن يشوي الوجه غابـر

من سد مأرب جاك يشعب ذلوله
ما معه غير أمه وقطعة عشايــر

يوم حكام اليمن ما صفولـــه
على مفارقهم يزف البشـايـــر

يا بنت ياللي من ظلالك خجولـه
حضك بها الدنيا مثل حـظ هاجـر

ولدك زايد ثيب الله أرجولـــه
في وادياً جمه على السطـح فايـر

نزل بواد كل الأقوام حولـــه
جابه من السد اليمـاني أمهاجــر

ملطوم والملطوم نفسه زعولــه
واقل وصف انه شجـاع مغامــر

أهواء على الوادي ونزح اقفولـه
وله نية في عزمها مـا يخايـــر

واليوم واديهم بعرضه وطولــه
ينسب لهم والطيب حـاضر بحاضر

من حقي امد حكم بشعري وأقولـه
والمدح في أهل الطيب قـبلة خواطر

شعري ما يهدف للعطاء والعموله
شعر المديح ابطـيبين المخابـــر

في مدحكم نفس الذيابي بسولـه
ومع الشعر تغلب علـيه المشاعـر

وطيبكم فاق القياس أمحصولــة
ولأنتم بفي حاجة لكاتـب وشاعـر

أنتم سنام الطيب وأنتم قبولــه
أهل عقيدة للمساجد منابـــــر

___________________________________

الإهداء لقبيلة الدواسر

لشيخ شمل قبيلة الدواسر / مران بن متعب بن قويد الدوسري
للصديق العزيز / الشيخ شجاع بن محمد بن مجدل الدوسري
لشائب القبيلة / صمعان بن محمد بن غماجة الدوسري
وكذلك إهداء لكل فرد من أفراد قبيلة الدواسر حاضره وباديه

..........................................

ولكم تحيات الشاعر / منيع الروقي