مدري وش اللي يصيبني يوم أناظرك = أضيع وأغرق وسط مدي وجزري
أنسى الخلايق كلهم وآتذكرك = يامصدر أحلامي من أيام صغري
ياملهمي لو تدري بحال شاعرك = ماكان بدلت المواصل بهجري
يمرني طيفك بليلي وأسامرك = ويضيق صدري كل ماقلت بسري
ويمرني صوتك بسمعي وأدورك = وألقاك في دم الشرايين تجري
ويمرني همسك ورقة مشاعرك = وألقاك حاضني بأبيات شعري
ويمرني غيمك ولا شوف ماطرك = وألقاك تسكن ذكرياتي وعطري
ويمرني شوقك بقلبي وأسافرك = وأبحر مع الأشواق في بحر فكري
ويمرني زولك بعيني وأساهرك = وآنا الذي من قبلك آنام بدري
المشكلة إني من سنين خابرك = عشرة عمر راحت بعمرك وعمري
لا تذيقني مرك بعد ذوق سكرك = وبعد المحبة لا تفكر بغدري
ياصاحبي مابيك تاخذ بخاطرك = لو يجرحك شعري ويوجعك حبري
أعاتبك لأني أحبك وأقدرك = عمر العتب ماحط قدرك وقدري
ودي أبوسك فوق خدك وأخدرك = وأنومك نومة هنا فوق صدري
وأقومك بشويش وأرجع وأناظرك = وأقول تكفى ما أبي شخص يدري