شىءٍ بقلبى يا ملا حايرٍ فيه = شىءٍ تحير ابه العقول الفهامي
مخفيه بفوادى و لا ودى ابديه = وأدور الخيرات شرقٍ وشامي
احترت به ما شفت شىءٍ يحاليه = واليوم ابا انشد عنه مانيب كامي
سيلٍ حدر مع وادىٍ غير واديه = مدرى حلالٍ ماه وإلا حرامي
كانه حلالٍ جايزٍ شرب صافيه = وش حلله يا مفسرين الحلامي
هاتوا تفاصيله وهاتوا معانيه = نبى الدليل اللى عليه الكلامي
نبي دليلٍ يفهم الدرب ماشيه = يمشي به التايه بليل الظلامي
يمشي به التايه ويقدى مواطيه = ويشرب قراح الماء ليا صار ظامي
لا شك هجسي يوم خلا مماشيه = إنه حرام ومنه زود الأثامي
احرم من الزقوم مره وحاليه = وشربه على الظامى يزيد الهيامي
الله من قلب همومه تقزيه = تدك به مثل الجراد التهامي
من ما جرى قامت تتله مشاحيه = تل الرشا من فوق هدف المقامي
روابعٍ قامت تصيبه وتخطيه = شاف الهوايل واختلاف الاسامي
ما يسمع الداعى ليا قام يدعيه = يعوم فى بحرٍ من الهم طامي
ما ينتبه للى بصوته يناديه = يزيد همه يوم كلٍ ينامي
يشوف وقتٍ ما عرفنا تواليه = وقتٍ يشّيب منه ابن الفطامي
هذا زمانٍ كاثراتٍ بلاويه= الغيم يقلب فيه عج وكتامي
يا بعد شرب الماء على كبد راجيه = ما سيل الغبرا زعوج الجهامي
انبيك يا من كلمة الحق ترضيه = أعطيك ما ينفعك وافهم كلامي
قصرٍ يذلك لا تقابل مبانيه = خله عسى شامخ طويله هدامي
خله عسى ما صاب أغادير يفنيه = يودع منازلـه الطويله رجامي
لو زان مدخاله وطالت حواميه = شيّد على الخيبه قليل الرحامي
وحىٍ يوريك المذلـه وتغليه = أنا أشهدأنك ميت القلب عامي
من لا يودك لا توده وترجيه = ارفع مقامك يا عزيز المقامي
ارفع مقامك عن عدوك وتوذيه = ويلحقك من تركت رفيقك ملامي
حق الرفيق وواجبه لا تخليه = يلزمك مثل الوالدين الحشامي
اختر عزيز الجار والحق يعطيه = شبلٍ على هرجٍ يقوله يحامي
ما دك به عرج المذلـه وطاريه = يسبق على فعل الفضيله شمامي
ومن قارب الأجرب بالأمراض يعديه = عدواه تسطي باللحم والعظامي
درب السلامه بيناتٍ مماشيه = ودرب العطب يّرث عليك اللكامي
أبعد وقلبك نازح البعد يشفيه = وتلقى عن الدار البغيضه مقامي
دارٍ بدار وداعي الذل عاصيه = ولا تقبل الذلـه نفوس الكرامي
الذل موت حايماتٍ ظواميه = أدخل على منزل فروض الصيامي
عن مقعد بالذل عينك تراعيه = الموت عند الذل أمان وسلامي
يرضى المذلـه من تردت هقاويه = والذل يجفل منه قلب العصامي
والعبد لــه ربٍ عن الناس يغنيه = ولولاه ما صاب الهدف كل رامي

المشاركة الأصلية كتبت بواسطة الشقرديه (المشاركة 446407) اللهـ لايهينكـ على نقلكـ الجميل ورحم اللهـ شاعر القصيدهـ مدرسهـ وهرم شعري كبير

المشاركة الأصلية كتبت بواسطة فيصل الشكري (المشاركة 446415) لاهنت يابو بدر على القصيده الرائعه ورحم الله الامير محمد بن احمد السديري واسكنه فسيح جناته تقبل تحياتي,,

المشاركة الأصلية كتبت بواسطة خيالية (المشاركة 446580) صــــح لســــاااان الشـــاعر الله يرحمه رحمة واسعــــه ،، وتســـلم يا أبو بدر على نقلك الرائع لا هنت ،،

المشاركة الأصلية كتبت بواسطة الجراح (المشاركة 448457) رحم الله الأمير الشاعر محمد الأحمد السديري رحمة واسعه وأسكنه فسيج جناته لاهنت يالحبيبي على ايراد هذا الأبيات الرائعة تحيااااتي

المشاركة الأصلية كتبت بواسطة نايف الخييلي (المشاركة 449146) الله يعافيك يابو بدر على طرحك وإختيارك الرائع لهذي القصيده الجميله ورحم الله الامير محمد السديري