يابـوي في صدري هواجيس وهمـــوم***واللي برك للحمل لازم يشيلـــــــه
قد لي شهر ما ذاقت عيوني النـــــــوم***ياكود غفوة ذيب في كل ليلـــــــــه
ادور الراحه عسى خير مقســــــــــوم***وشلون صارت راحتي مستحيلــه
يا بوي وانت اسمك مقدر وحشــــــوم***وان تاهت اقدامي تراك الدليلــــه
تعبت وانا اقبل جباه وخشـــــــــــــــوم***واجامل اللي مانفعني حصيلـــــــه
صارت حياة الناس من يفرق الســوم***واللي ما معه فلوس ياعزتيلـــــه
قلوا هل النوماس ذباحة الكـــــــــــوم***وكثروا مزودة الهروج القليلـــــه
وزادو هل النمات طرادة اللـــــــــــوم***هذا تحكي فيه وهذاك تحكيلـــــــه
وشفنا شيوخ الاسم من غير مرسوم***اهل البشوت اللي كممها طويلــه
لو انها بالسيف ومناطح القـــــــــــوم***ومداحم الفرسان يوم الدبيلــــــه
في ذمتي ان تشوف شجعان ورخـوم***وتشوف بعض الناس يومي شليله
لكنها شيخة دنانير وختــــــــــــــــــوم***وشيخ الدراهم فوق شيخ القبيله
وانا اعرف الناس معطى ومحــــروم***واللي كتبه الله لعبده يجيلــــــــــه
لكن مهما عاش لا بد له يـــــــــــــوم***يحط وسط الحفره المستطيلــــــه
وانا لاني ظالم ولاني بمظلــــــــــــوم***لكن علي حمول بقعا ثقيلــــــــــه
آجابه الدنيا ولاني بملـــــــــــــــــزوم***اطرد ورى برقٍٍٍ سرى فالمخيلـه
والله ماغبط إلا كريم له عـــــــــزوم***المال عنده والنشاما تجيلـــــــــه
وفي مجلسه ذا داخل وذا يبي يقــوم***وكل عقب كرامته يدعيلــــــــــــه
هذي هي الغايه لكن والله علــــــوم***ماكل غايه يوجد لها وسيلـــــــــه
والله ما يشحني راع الكبروالـــزوم***وراع الجميل اللي يمن بجميلـــه
الطيب يتعب كل قرم وشغمـــــــــوم***وما يكسبه راع اليمين البخيلـــه
ورفيقي اللي ما ينفعني ولا يــــــوم***اخير من رفقته شوف الحليلـــــه
ورفيقي اللي فالـشـدايـد معــي دوم***نذر علي اني مادور بديلـــــــــــــه