يسقيك يا وادي الدواسر هماليل=من مدلهمٍ به تحن الرعودي
نوه كما زرق الجمال المحاميل=قافٍ من الدندان جا من وجودي
عقب المطر يدرج على قاعك السيل=يا ديرةٍ بين السهل والنفودي
دارٍ حميناها على شرد الخيل=يومٍ كلٍ عن حياضه يذودي
عفوا جوانبها الرجال الحلاحيل=يوم الرماح ويوم قدح الزنودي
أبعد على الطامع من الجدي وسهيل=و أن كانها بالطيب يرقى سنودي
دارٍ لنا ورثٍ لجيل بعد جيل=و أحبها وأنا بسن المهودي
في موقعٍ يشفي الكبود المغاليل=كلٍ يريده مير عنه محدودي
شمالها حمر الطعوس المهاليل=وجنوبها سهلٍ بليا حدودي
مدينةٍ فيها جميع المحاصيل=من فضل ربي كل يومٍ بزودي
فيها الغروس الداجيات المظاليل=مناظرٍ تعمي عيون الحسودي
ومزارعٍ خضرٍ سواة المغاييل=هذاك مزروع وذاك محصودي
و مسبلة للناس بالصبح والليل=ولا خير في هرجٍ بليا شهودي
وفيها لسود البل مرب ومداهيل=جرد الرقاب منزحات العدودي
سود تقل مداخلٍ لونها نيل=طفحٍ لواحيها وساع الخدودd