ليا طرقت الباب و الباب مصكوك=حاول بكل الطرق حتى تفكه
و لا تقول الحض عاثر و مبروك=ربك هو القادر بفكه و صكه
و إن ما عطاك الله ترى الناس ما عطوك=الله هو الرازق و لافيه شكه
و لا تشتغل بالناس تاجر و صعلوك=جنّب عن الجاهل و من فيه دكه
و اصبر على الجيران لو انهم آذوك=جار البلد معروف ما منه فكه
قال المثل و العالم اللي به انبوك=قصير بر و لا قصير البلكه
بينك و بينه خلّوا الزاد مشروك=الباب دون الجار بالك تلكه
وصل القرايب يلزمك لو ما جوك=ذا واجبٍ يلزم مثل حج مكه
و عز الثنين اللي من الصغر ربوك=و صل الفروض الخمس و المال زكه

يالعبد كان انك عن الدين صديت=و الله ما تلقى الوفق و السعاده
مهما جمعت من الملايين و ابليت=ترى حياتك كلها في نكاده
متشتتٍ فكرك ورا المال تشتيت=و رزقك يجي من غير نقص و زياده
خلك بذكر الله ليا اصبحت و امسيت=و اذكر صباح الموت و لاّ هجاده
و اذكر ليا منك على اللوح شليت=ما ينفعك يا كود حسن العباده
و اذكر ليا من داخل القبر حطيت=و يمناك حطت تحت خدك و ساده
و اذكر ليا من داخل القبر خليت=و منكر ليا جاك و يش الإفاده
لا نافعك حيٍ ولا نافعك ميت=واللي زرع لابد يجني حصاده
و اخلاف ذا ياللي لك اسجد و صليت=عبدك تقبل دعوته و اجتهاده
يا رب تغفر زلتي كان زليت=طالبك حسن الخاتمه و الشهاده