يالله يامنـزل تبـارك والاعـراف=يافارج الضيقـه عزيـز الجلالـي
تجبر عزا قلبي على فقـد نـواف=وتمدني بالصبـر لفـراق غالـي
جاني خبر نواف معدوم الاوصـاف=يوم الربوع وقلت عـزي لحالـي
اصغر اخوانه جاي يخبر بما شاف=والدمع من العين على الخد سالـي
بعد العشا قلبي من الهـم ينـلاف=والموقف اللي صار فوق احتمالـي
قلت اخبروني على ماصابه خـلاف=قالوا بسرعه لو سمحتـي تعالـي
نشدت وينه قالوا انـه بالاسعـاف=ويمكن لشوفـه مايجيلـك مجالـي
ويوم فجعوني صار بالقلب خفخاف=واركض وصاب العقل مثل الهبالي
ورحت لحبيب القلب والدمع ذراف=وحلو النبا له صوره فـي خيالـي
لقيت نور العين ملحـوف بلحـاف=واللي هناك يقدمـون العـزا لـي
ويوم الخميس محمل فوق الاكتاف=للمقبـره شالـوه جمـع الرجالـي
ولولاي اخاف الله الاعدي بمشراف=واني لاشق الجيـب ممـا جرلـي
لكن عساه بجنت الخلـد ينشـاف=ويغفر له المعبود منـش الخيالـي