مابين تطبيق السلام وبين تحديد المصير=نشعب ركايبنا ونحداها على رد البرى
يسوقها ضرب العصا ويهجها حس الصفير=وتدبك بنا واللي على الركبي يهرول مادرى
تمشى بنا والقيض يشويها مع طول المسير=وتبرك بنا في وسط سوق بين بيع ومشترى
وليا التفتنا للجمل حن ورغى بعد الهدير=وحتى الصميل اللي على جنب المطيات انفرى
وحنا نحسب انا بلغنا القصد والخير الوفير=ماندرى ان الوقت وقفنا على باب الزرى
وندور مع ناس تقول الوقت لازم يستدير=ونصبر على بيت قبل ستين عام بلا ذرى
نقول نتبع دورنا يالله عسى مقسوم خير=نمسك سرى ونموت موتة ضيم ماجانا السرى
نرقب متى علم الفرج ياتي مع الصبح المنير=من شان عين في الظلام وفي متاهاته ترى
ياناس ليه الكذب مادام ان واقعنا مرير=ليه نتجاهل ماحصل ليه نتناسى ماجرى
ياناس ليه اسكاتنا والصد عن جرح خطير=يعني بضحكتنا برى والله ليبطى ما برى
ياناس زاد الحمل ما يقدر على القوم البعير=وان قام موته جاه في الهفه بعد طلعة كرى
يكفي قهر يكفي سهر مابين نار وزمهرير=يكفي حياه بين تجار ومشايخ وشعرى
يكفي حكي ياللي تضد القوم بالسيف الشطير=وتقول ابوي الشيخ وجدودي مناصب واومرى
لد النظر فاللي خذا حقك ولافك الاسير=على عيون منظمات الامن والسلم جهرى
اليا متى نصبر مادام انا نجير المستجير=وتوحيدنا واحد ونظرتنا الى ام القرى
صحيح نملك مال بس احساسنا حس الفقير=واللي يواسينا صلاح الدين لامنه طرى
وصلاح مات وجاتنا الدنيا عبوس قمطرير=واحد رقد منا والاخر مات ماذاق الكرى
نبغي الحضارة لين مركزنا طلع بعد الاخير=ولاعاد به غيره سوات اللي على الذله ضرى
وان كاننا مليار مسلم مابنا صحوه ضمير=بكتب نهاية امه تعيش من تحت الثرى

وان كاننا مليار مسلم مابنا صحوه ضمير=بكتب نهاية امه تعيش من تحت الثرى

يكفـي قهـر يكفـي سهـر مابيـن نـار وزمهريـر=يكـفـي حـيـاه بـيـن تـجـار ومشـايـخ وشـعـرى
يكفي حكي ياللي تضد القـوم بالسيـف الشطيـر=وتقول ابوي الشيخ وجدودي مناصب واومرى