قصيدة في الافــــــــلاج

جيت الرياض وردني يمك الشـوق =يا ديـرة الألمـاس والتبـر والعـاج
أفز واصحي وافتح العيـن وافـوق = لا مـن دعانـي صـوب الافــلاج
يا دار ليلى العامريـة لـك حقـوق = حبـك تعلـق بالمحـاجـر والاوداج
قولي وطولي وارفعي هامتك فـوق = لا يزعجك يا دارنـا هـرج هـراج
تبختري يا دارنا والبسـي الطـوق = وتزينـي لـكـل زايــر ونـهـاج
جيت الرياض وخافقي كله حـروق = جابتني الدنيـا علـى كـف محتـاج
لا جابني وجـد ولا جابنـي تـوق = راحت بي أمواج وجابتنـي امـواج
يا ديرة فيها الحسن صـار مخلـوق= تستاهليـن المجـد والعـز والـتـاج
انتي دوى اللي صابه هبال وطفـوق = وعلاج لكي صـار محتـاج لعـلاج
للناس غايـات وآنـا غايتـي فـوق = نوخت غاياتي علـى أرض الافـلاج
فيك الكرم تعقل له الحيـل والنـوق = وخطاب ودك جاوك افواج وافـواج
وأرض سماها كلها رعود وبـروق = يـا جعلهـا للسيـل درب ومنـهـاج
الموق غالي وانتي اغلى من الموق = وما ظن يلحقني مـع حبـك احـراج
انتي النظر وانتي العمر وانتي الذوق = سحرك طغى من غير زينة ومكيـاج
كني إذا جيتـك مطـارد وملحـوق = وكني إذا وادعتـك مخـرج اخـراج
بين الديار وبينـك فـروق وفـروق = محد يقـول آن القمـر كنـه سـراج
يا سامعي لا صرت ضايق ومزنوق= شد الرحال وهيتنا صـوب الافـلاج
تلقى المراجل هزها يمـك الشـوق= تلقى النشامى وضحكة عيون وحجاج