بسم الله الرحمن الرحيم


( اوصيك عند الجار و الضيف و الخوي )


قصيدة للشاعر / همام بن عايض آل حميد الرجباني الدوسري يوصي أخاه ذياب بن عايض آل حميد ويقول فيها :

يقول الحميدي و الذي بات ساهر = نجوم الشتا غابت و حن سامرينها
من عبرة كنيتها في ضمايري = و اذودها ذود النهل مرسلينها
كنيتها في ضامري ثم نقدتها = نقد الدراهم في يدي حاسبينها
من ذلتي يدري بها كل خامل = ماهمته عسر الليالي ولينها
ماهمه اهل هجن لا منهم اقبلوا = عراقيبهم لعضودها و اسمينها
نقلط لهم الترحيب و الفرش و الذرا = ترحيب حتى تبتجح(1)راكبينها
ناخذ من الشوان كبش لواجبه = يفهق ثمنها لين يسير مدينها
نسوم سوم أول ثم تالي = و ان باعنا و الا فحن عاقرينها (2)
نقلط لهم من تمر غرس مقاري = غرايس من جدنا وارثينها
نحلب لهم من در عرب اليا امرحت = ذيدانا من حفنا كا سبينها
سلاحنا من كل حدبا طويله = خيم الفرنجي (3) معجبة ناقلينها
يسرح بها من لابتي كل نادر = و على المناجم (4) لا بتي لازمينها
نجدد لها الألباس(5) ما حن خبره = يشلونها معهم وهم داثرينها
ذبايل تزويها اليدين النظايف = و كيال وقفات مع دايفينها
كم خشم محواز لياما وطنه = تخاز عجلات و حسن سابقينها
خطر على القايد يفارق ولايفه = من ضرب جبعا (6) ما يطرد كوينها
يا ذياب أنا باوصيك مني وصية = وصية عسمت على فاهمينها
باوصيك لا جاك اجني لحاجه = اقضه ولو من مالنا مشترينها
واوصيك لا تذخر مخذ بنت طيب = حتى يجي ينكي المعادي جنينها
واوصيك عند الجار و الضيف و الخوي = اعطي الرجال حقوقها لا تهينها
واوصيك لامن جاك راعي طلابه = اترك معي الهرج و اعمد سمينها
يروح منك مخلصه و انت خالص = و جحور الردى ما دسمت حافرينها
و ان جاك راعي عيله فاقضي عليته = بإيمان من كثر الخطا لا زمينها
فاليا وجدت اقضاه زد له و عدله = بصيعان(7) جور عذبت كايلينها

***
معاني الكلمات

1- تبتجح : ترتاح .
2- عاقرينها : العادة عند بعض القبائل إذا جاء أحدهم ضيف يذهب إلى صاحب الغنم ليشتري ذبيحة
و يكرم ضيفه فإذا امتنع من بيعه أخذها بدون إذنه بعد أن يعقرها و يصبح ثمنها ضعفين ، و هذا عرف متبع .
3- الفرنجي : نوع من البنادق .
4- المناجم : رؤوس الجبال .
5- نجدد لها الألباس : يوضع للبندقية جلد راس الضبي أو الوعل و يسمى " القفدة " .
6- جبعا : نوع من البنادق .
7- بصيعان : وزن من البارود المعمول يدوياً .

رياض
من الأدب الشعبي