من ضاق صدره ركب وأفتر في بنده=اللي حداه الطفش واللي له أشغالي
والناس باأفكارها كل على قده=ولولا أختلاف النظر ماجابها أشكالي
والناس كل يبي يمشي على ودَه=كلٍ يدور لشفه قدر ماأحتالي
وأنا هوايه وشف البال باآعدَه=ممـشاً بوسط النبات ودمث الاسهالـي
خص أليا زاف عشبه وأرتفع فنده=متخالط زاهره من كل الاشكالي
بأركب على موتر مادور الكدَه=مايوم وقف على الركاب يشتالي
شد الخواجه جديدٍ مانقل عدَه=فيكسار فتحه ومكره وارد التالي
راعيه لاجاء لزوم البر ماردَه=يبغيه يطوي بعيد الخط لو طالي
فيازين ممشى البريمي لالحق حدَه=مع سهلةٍ خاليه ماطبها أزوالي
يبغي ديار كساه النبت من مُده=فيها فراقين نجع البدو نزالي
نجعٍ مقيم ونجعٍ في طرف شده=ونجعٍ على السير ينزل طيب الفالي
واللي سرح في الدبش من القفر مارده=متشوبشٍ في هوى السرفات الاجهالي
لاجيتهم يمضي الاسبوع ماأعده=أعيش معهم وقلبي داله سالي
أسج معهم وعند الله ماعنده=مادمتنا حي بمشي في هوى بالي
والعمر محدود حده لاأنتهى حده=لابد من حفرةٍ بالرمل تنهالي
هذا هوايه وشف البال مع وده=البر وأهله ربيع القلب والحالي
والناس بأفكارها كل على قده=ولولا أختلاف النظر ماجابها أشكالي

وآقلبِ ياللي شكى شكواه مـن جـدَهْ=مما يكنه شكى همـه علـى الغالـي
هاضت إشجوني مع اللي واصلٍ حدَهْ=وأنا إمن أوَل إبخيـر ودالـهٍ سالـي
حضَر إهجوسي وأنا ماأقدر على ردَهْ=من ماضي الوقت جددْ جرحي التالي
ياجايـب العلـم هـذا خطـنـا ودَه=لبو بطـي ود علمـي يابعـد حالـي
وصلْ له أخبـار قلـبٍ بايـحٍ سـدَهْ=إنكانِ جاله من الصدمـات ماجالـي
يالدوسري مابقى من العمـر بآعـدَهْ=لوكان ماضيه منهـم قطَـع إحبالـي
هذا زمـانٍ قضبنـا وأحكـم الشـدَهْ=عزيلِ قلبك مِـن الماضـي وعزَالـي
ذكرى الطرب مانسينـا بـأول المـدَهْ=أمسٍ صفالي وعيَـا اليـوم يصفالـي
ذكرني اللي يدق الوشـم فـي خـدَهْ=يازين دقتـه حـدرى حبـة الخالـي
إليا كستها إرمـوش العيـن مسـودَهْ=سودٍ يلا أغضا بها ضيعت الأقوالـي
والموت لاقال وينك ويـش ذالصـدَهْ=طوَلت عنَـا ومنـك العلـم ماجالـي
مايدري إنـا نحسـب اليـوم ونعـدَهْ=عقبه مع الناس كني عايـشِ لحالـي
حبل الرجاء نوب أشد ونوبـن أهـدَهْ=يابوبطـي مالفانـي منـه مرسالـي
وأبواب وصلي عليـه اليـوم منلْـدَهْ=حظ الردى بيـن مطـلاعٍ ومنزالـي
ودي بشوفـه وهـو ياصاحبـي ودَهْ=مازال يملك خفايـا القلـب مازالـي
لو لا تضايقت إتوسع خاطـري بنْـدهْ=ماكان عنها طلعنـا بالخـلا الخالـي

قال اللذي لابغى بـدع المثِـلْ عـدَهْ=مِنْ فضلِ ربٍ على كل البشرْ عالـي
لامن حظرْ هاجسِه ينقى علـى قـدَهْ=ويصوَرِ اللي طراله وسْط الأمثالـي
يامرحبا بالشجاع اللي كِشـفْ سـدَهْ=يامرحبـا ياهـلا بالطيـب الغالـي
الليٍ بنى في طويـلات النبـا مجـدِهْ=أبو سعد يا عريـب الجـد والخالـي
الشاعر اللي جزيل القاف مِـنْ عنـدِهْ=يعدَهـا لانطقهـا جنـيـه وريـالـي
يشكي زمانٍ مضالـه والدهـر حـدَهْ=ويشكي الهوى والمحبة طيب الفالـي
يشكـي علينـا وحالـي كنـه القِـدَهْ=من جور وقتٍ سبب همي وغربالـي
والوقت لاجار ماأحـد ٍ يقـدرْ يـردَهْ=الناس ماأحدٍ ذكر لي دالـه سالـي
وجدي ووجدكْ على اللي فاتِ مِنْ مدَهْ=أيـام مـرتْ علينـا يابـري حالـي
يوم الهوى يرفع العشَاق فـي زنـدِهْ=مبني على الصدقِ والإخلاصِ للغالي
واليـوم حِـبَ الخلايـقْ هاتـه وٌودَهْ=سواةِ فيـتْ عصـر والفـيَ ينزالـي
وأثني على اللي حفظ حبه على عهده=من ماضي الوقت حتى وقتنا التالـي
فليت الزمن ماغدابـه يرجـع يـردَهْ=ويرجع لنا وقتنا اللي يشـرح البالـي
ياأبو سعد حاضـرٍ مادونكـم صـدَه=من يعتزيبي إفِـداه الحـال والمالـي
أنـا رفيقـك بوقـت الليـن والشـدَه=وأنا خويَك بوقـت المـر والحالـي
صامـل وماتطلبـه ياصاحبـي بـدَه=ماني بمن ينفهـق لاجـات الافعالـي
ماقلـت هـذا الكـلام إلاَ وأنـا قـدَه=مادمت حيٍ وأنـا للطيـب أبحتالـي
والعمر محدود حـده لاأنتهـى حـدَه=لابـد مـن حفـرةٍ بالرمـل تنهالـي
وختامهـا جـاك تقديـري مـع ردَه=الله يعين اللي شكى ياطيـب الفالـي