يامن حسبت السنين الجرد بالهجري=توّي معك مبتدي تاريخ ميلادي
لاتحسب اللي مضى أو راح من عمري=مافات مات وكفاك حساب واعدادي
من يوم جيت ونزلت و ساحتك صدري=عرفتنا إني زماني عشت به غادي
ليتك لفيت وضويت بدنيتي بدري=كان استريح بمنامي واهتني زادي
يامن سكنت الحنايا كان ماتدري=عن مامضى من حياتي: (هم) و (سهادي)
وانكان تبغى الدلايل لـدّ في شعري=قصايدن في سما الحرمان تنقادي
أسري بها الليل لو الليل مايسري=أشب نار القصيدة واضبط قنادي
أناجي اللي حفظ في غيبتي قدري=ووطيت لاجله على هامات حسادي
ما ابيع مع غيره من الناس ما أشري=بين الحنايا ينادي باسمه منادي
الله عطاك الغلا في خافقي حصري=لو كان غيرك يبي مثلك ولا فادي
غلاك في مهجتي يامنوتي فطري=أحتاج له حاجتي للشرب والزادي
كم ليلة(ن) باردة طيفك علي يطري=ويشب جمر الغلا فالصدر وقـّـادي
يشع نجم القصايد ويغرب صبري=لامن حدا مهجتي لمواصلك حادي
ولامن تذكرت طلة وجهك العذري=وصوت(ن) يداعب سموعي بالهوى هادي
كني ملكت المداين والعصر عصري=وصوت السعادة على خفاقي ينادي
يانعمة(ن) ساقها الرحمن للفقري=أنا اشهد إنه كريم وبالعطا زادي
خل الليالي على موالها تجري=واليا عرف سرنا حسادنا.... عادي!
واللي أعرفه أكيد.. إني أبد مدري=عن مامضى واعتبر لقياك ميلادي

المشاركة الأصلية كتبت بواسطة محسن الودعاني (المشاركة 294020) صح لسانك وزادك الله من فضايله يانايف

المشاركة الأصلية كتبت بواسطة ابن فادر (المشاركة 294041) لو كان غيـرك يبـي مثلـك ولا فـادي = أحتاج لـه حاجتـي للشـرب والـزادي = ويشـب جمـر الغـلا فالصـدر وقّـادي = لامن حـدا مهجتـي لمواصلـك حـادي = كني ملكت المدايـن والعصـر عصـري= الاخ نايف مسرع صح لسانك على القصيده الرائعه التى تحاكي الوجدان عذبه سلسه لايمل من اعادة قراءتها لك تحياتي الجميله

الله عطاك الغلا فـي خافقـي حصـري لو كان غيرك يبي مثلك ولا فـادي غلاك فـي مهجتـي يامنوتـي فطـري أحتاج له حاجتي للشرب والـزادي