حبيبتي تشرب على الريـق بيبسـي =واليا تعشّت ماكلـت غيـر كتكـات
حبيبتي حطّت علـى العيـن ورْسـي =وماتلبس الا مــن جديـد الموديـلات
نحـيـفــة(ن) عـن كـل عــذرا تنّسـي= في حسنها قـد كلْبشتْنـي كلبشـات
احبهـا بـس الـعـرب ماتحـسّـي =والله يعيـن المبتلـي بالطـويـلات
ياونتّـي ونّـات سـوّاق تكـسـي=زل النهـار وماحصـل لـه ريـالات
والا مريض(ن) علّتـه شـي نفسـي =مافاد بـه كـي العـرب والقـراءات
لاشفتها كنّـي مصـاب(ن) ابمسّـي=مثل المهبّـل قمـت اقطّـع إشـارات
وليا حكت كنّي من النـاس خرسـي =أطرش .. خرس .. لو دوّسنّه تريلات
فيها حلا الأسبان وعطـر الفرنسـي =وفيها دلـع لبنـان وعـز الإمـارات
حلوه مثل طعم الكـرز والجالكسـي=مخلوط بالسكّر معه خمـس تمـرات
لوما تزوج (عجرم) وجاب (نانسـي) =يحق لي أتـزوج ( أبـله عطيّـات)
لاقلت : شكراً ، قالت البنت : مرسي =بنت الأفندي ناظـرت لـي بغمـزات
يجلدني الاستـاذ لااهملـت درسـي =مايـدري أنـي واقـع(ن) بالبنيّـات
ابكي واقول ان البلا كـان ضرسـي =يااستـاذ تكفـى لاتنقّـص علامـات
انا وقعت اليوم مـن فـوق كرسـي =ولاحصل لي مـن حبيبـي زيـارات
قالت: أنا ليلى ، وبسمّيـك : قيسـي=عطني شعر واعطيك ضحكه وبسمات
قالت: تجي لابـوي ثـمّ(ن) تمسّـي=بس المهر تاقـف عليّـا خفـارات!
قلت: اسمحي لي واعلني بـالmbc =تلقيـن غيـري يابنيّـه حـثـالات
يشهد على ماقـول بيتـر وعبسـي =ونحول ونامق بالرسـم والحراكـات
اليا حضرتوا يالربـع يـوم عرسـي =عانيّتـي منكـم كراتيـن كتـكـات