الله من قلبٍ همومه تلوفه=والهم والهاجوس عنده ولايف
واثّر على حال برته النحوفة=لاقلت هوّد جا من الهم طايف
قلب تمنا والليالي عيوفه=واصبح من احداث المقادير عايف
في كل يوم الحزن يصنع بروفة=وتنشر على الاخبار قبل الصحايف
سبت ثلاثٍ للمعنا كلوفة=تسوى مقاليد الشرف والوظايف
في وقتنا اللي مالقي له طروفه=هن لذة الدنيا وهن الطرايف
جند لهن قلب الشقاوي صفوفه =واصبح لهن باب الحنايا مسايف
الأولة جيب غريبة وصوفه=جيب على كيف الضمير المهايف
تصدير شركة فالخليج امعروفة=من البريمي كل مافيه كايف
لامن نهمته واستدارت بلوفه=بتقول حر فوق روس النوايف
وليا قفيته شفت طبعت حروفه=طبعت حروفه مثل توقيع نايف
اليا استوى المرواح محدٍ يطوفه=راعيه وقت الجد ماهو بخايف
يصنعه من نفسه عليه امعسوفه= يقود علم الصنع قود العسايف
حقق طموحاته وساوى رفوفه= تصتيع خبرة عمر ماهو بزايف
موتر غناويٍ يضيع ولوفه=ماهوب في صرف الدنانير رايف
وحسرت فقيرٍ حادياته ظروفه=لويتحسف ماتفيد الحسايف
والثانية نفسي عليها شغوفة=سود البكار اللي زهن السفايف
طفح اللواحي مبعدات الحسوفة=فنس الخشوم مكملات الوصايف
جرد الرقاب اللي ماهي بمعكوفة=اللي لها يوم الملاقا وقايف
كم شيخ قومٍ قد تذوّق حتوفه=من شانها يوم السنين العجايف
تذري عن الوقت الظلوم وصدوفه=لاصار في الدنيا علوم وجزايف
وعسا السحاب اللي تزبر قنوفه= واقبل من القبلة مزونه ردايف
يسقي ديارٍ شاكيات الحفوفة=مدهال ترعات الرقاب النوايف
وجميع عشبٍ في ثراها تشوفه=وشوف الخزامى والنفل فالحوايف
وصوت أم سالم كنه صوت امعزوفة= تسوى السياحة والسفر والمصايف
والثالثة غروٍ ملكني امعروفه=أبو الثمان القاتلات الرهايف
والعين شرٍ لي ولابه مروفه=من شوفها ذقت العنا والكلايف
لامن تكلم سحر بابل تشوفه= كنّه يخدرني بهمس الشفايف
وليا تنطحه الهوى في وقوفه= ادعي عسا يلتم شمل الولايف
يفداه من حناه خضب كفوفه= وتفداه خدرات البني العفايف
حبه ملك قلب المعنا وجوفه=وطبع حروفه في الضلوع النحايف
والقلب من غيره سريعٍ نكوفه=يوم ان حبه في العروق الصخايف
مشيت مع قلب صعيبة شفوفه=قلب يلوفه من هوى الزين لايف
وعزفت من بين الضلوع امعزوفة= لين اثّرت فهل القلوب النظايف
أثر السعادة بالهموم امحفوفة= وشيل الثقايل قبل شيل الخفايف
هذي مناتي والليال امخلوفة= قدام لا تطوى علي اللفايف